«Միլանոյի» գործով փաստաբաններն այսօր ասուլիս են հրավիրել, որտեղ ևս մեկ անգամ անդրադառնալով տարածքից սեփականատիրոջը վտարելու գործընթացին, տեղեկացրել են, որ պատրաստվում են առաջիկայում գանգատ ներկայացնել Եվրադատարան:

«Համոզված եմ' մենք հերթական անգամ Եվրադատարանից ստանալու ենք վճիռ, որով ոմն մեկի տնտեսական շահերի համար պատասխանատվություն է կրելու ՀՀ պետբյուջեն», ասում է գործով փաստաբան Հայկ Ալումյանը,- Շատ երկրների դեմ է Եվրադատարանը վճիռներ կայացնում, սակայն վճիռ էլ կա, վճիռ էլ: Եվրոպական դատարանում ցնցվելու են այս գործից, երբ տեսնեն, որ աշխարհում կա պետություն, որտեղ նման բաներ են տեղի ունենում»

Աբովյան թիվ 4 հասցեում գտնվող «Միլանո» խանութի տարածքը վերցվել է սեփականատիրոջից' Հովհաննես Ղուկասյանից, «հասարակության և պետության կարիքների համար» պատճառաբանությամբ։ Հայկ Ալումյանի խոսքով' ամբողջ գործընթացն իրականացվել է օրենսդրական նորմերի կոպիտ խախտումներով:

«Այս մարդկանց հետ պայմանագիր չեն կնքել, գումար չեն տվել, բայց վտարել են: Ես չգիտեմ' էդ ինչ շահեր են այստեղ ի հայտ եկել, որ այդ աստիճան բարբարոսական վերաբերմունք է ցուցաբերվել և արհամարվել է օրենքը»,- հարցադրում է անում փաստաբանը:

Ըստ նրա' ԴԱՀԿ ծայությունը վտարման գործընթացը վերածել է բարբարոսական հարձակման, որի տեսանյութերը կան:

«Այն, ինչ տեղի ունեցավ վտարման ընթացքում, աննկարագրելի է: Եթե այդ մարդիկ չներկայանային որպես ԴԱՀԿ աշխատակից, ոչ ոք չէր կարող դա գուշակել: Թվում էր, թե ինչ-որ ավազակային հարձակում է կատարվում»,- ասում է փաստաբան Հայկ Ալումյանը:

«Միլանո»-ի սեփականատիրոջ ունեցվածքը գնահատել են ընդամենը 207 մլն դրամ' 1 քմ-ն հաշվելով 5 հազ. դոլար: Այնինչ, ըստ փաստաբանի, պետք է գումարի կրկնակին հատուցվեր.

«Ես չգիտեմ, թե ով այդ ՍՊԸ-ում ինչ շահեր ունի, որ դատարաններն այդ ընկերությանը նվիրում են «Միլանո» խանութի գույքի 70 տոկոսը»:

Դատարանի վճռով նախատեսված է փոխհատուցում տալ միայն խանութի առաջին հարկի համար, այնինչ կա նաև երկրորդ հարկ, որը Ղուկասյանը օրինական կերպով գնել է պետությունից:

«Վառ երևակայություն ունեցողը միայն կարող է երկու հարկերը մեկ հարկ համարել»,- նշեց փաստաբանը:

«Միլանո»-ի սեփականատիրոջ հետ պայմանագիր մինչև օրս դեռ չի կնքվել, գումարն էլ չի փոխհատուցվել:

«Դեռ պայամանագիրը չկնքած' կատարողական վարույթը կարճել են, ինչը խախտում է  համարվում: ԴԱՀԿ գերնպատակը Ղուկասյանին իր ընտանիքով այդտեղից վտարելն էր»,- արձանագրում է Ալումյանը: