Հեռուստատեսության և ռադիոյի ազգային հանձնաժողովը
մայիսի 18-ին կայացած նիստում կարճեց «Երկիր մեդիա» և «Կենտրոն» հեռուստաընկերությունների
դեմ բացված վարչական վարույթը:

ՀՌԱՀ-ի կողմից իրականացված մոնիթորինգի արդյունքներով՝
այս հեռուստաընկերությունների լրատվական հաղորդումները, նախընտրական քարոզչությունը
լուսաբանելիս, հավասար պայմաններ չեն ապահովել բոլոր կուսակցությունների և կուսակցությունների
դաշինքների համար՝ խախտելով ՀՀ ընտրական օրենսգրքի 19-րդ հոդվածի պահանջները:

Մասնավորապես, «Կենտրոն» հեռուստաընկերության
«Էպիկենտրոն» լրատվական հաղորդումը «Բարգավաճ Հայաստան» կուսակցությանը լուսաբանել
է 1273 րոպե, իսկ մյուս քաղաքական ուժերին՝ առավելագույնը 322 րոպե:

«Երկիր մեդիա»–ի «Երկրի հարցը» լրատվականն
ամենաշատը լուսաբանել է Հայ Յեղափոխական Դաշնակցության քարոզչությունը՝ 744 րոպե: Երկրորդ
տեղում ՀՀԿ-ն է՝ 450 րոպե եթերաժամանակով:

ՀՌԱՀ
վերահսկողության վարչության մոնիթորինգի արդյունքները: Համամասնական ընտրակարգով առաջադրված
քաղաքական ուժերի նախընտրական քարոզչական գործունեության լուսաբանմանը տրամադրած եթերաժամանակը՝
րոպեներով:

Նիստին ներկա էին նաև երկու հեռուստաընկերությունների
ներկայացուցիչները:

«Կենտրոն»
հեռուստաընկերության իրավաբան Արա Սահումյանը նշեց, որ հեռուստաընկերությունը ձգտել
է քարոզչության ժամանակ բոլոր քաղաքական ուժերի համար ապահովել հավասար պայմաններ:

«Չի եղել քարոզչական մի միջոցառում, որի մասին
մենք տեղյակ ենք եղել, սակայն չեն լուսաբանել, սակայն ոչ բոլոր կուսակցություններն
են նախապես տրամադրել քարոզարշավի ժամանակացուցը կամ ժամանակին իրազեկել միջոցառումների
մասին»,- մեկնաբանեց Սահումյանը:

Նա հավելեց, որ խնդիրը կապված է ՀՌԱՀ մշտադիտարկման
մեթոդոլոգիայի հետ, և իրենց համար պարզ չեն եղել համամասնական և մեծամասնական կարգով
առաջադրված թեկնածուներին տրամադրված եթերաժամանակի տարանջատման սկզբունքները:

Գրեթե նույն պարզաբանումները տվեց նաև «Երկիր
մեդիա»–ի լրատվական և քաղաքական հաղորդումների տնօրեն Գեղամ Մանուկյանը:

Հանձնաժողովը քվեարկությամբ որոշեց կարճել
երկու հեռուստաընկերությունների դեմ հարուցված վարույթները՝ հաշվի առնելով, որ ՀՌԱՀ-ն
առաջին անգամ է մշտադիտարկում իրականացնում, որի մեթոդաբանությունը տարըմբռնումների
տեղիք է տվել, և առկա են «մեղմացուցիչ հանգամանքներ»:

Հիշեցնենք,
որ ՀՌԱՀ նախորդ նիստին «Կենտրոն» հեռուստաընկերությունը  տուգանվեց 1 մլն դրամով՝ ընտրությունների օրը հակաքարոզչություն պարունակող տեսանյութհեռարձակելուհամար:

Նիստի ավարտից հետո ՀՌԱՀ նախագահ Գրիգոր Ամալյանը
լրագրողներին մեկնաբանեց, որ այս պարագայում հեռուստաընկերությունների համար խնդրահարույց
է ոչ այնքան տուգանքի չափը, այլ՝ տույժերի քանակը, քանի որ դա կարող է հանգեցնել հեռուստաընկերության
լիցենզիայի դադարեցմանը: