Անչափահաս զոհերի նկատմամբ սեռական հանցագործությունների դեմ պայքարող հասարակական կազմակերպությունների ներկայացուցիչները համոզված են, որ ՀՀ քրեական օրենսգիրքն իր հոդվածներով ավելի շատ «հող է նախապատրաստում» նման հանցագործությունների զարգացման համար:

2011թ. փետրվարի 2-ին «Սեռական հանցագործությունների անչափահաս զոհերի պաշտպանության խնդիրները ՀՀ-ում» թեմայով մամուլի ասուլիս է անցկացվել "People in Need" չեխական ընկերության հայաստանյան ներկայացուցչության կողմից:

ՀՀ քրեական օրենսգիրքը սեռական անձեռնմխելիության և սեռական ազատության դեմ ուղղված հանցագործությունների վերաբերյալ 5 հոդված է նախատեսում, որոնցից բովանդակությամբ անընդունելին, "People in need" կազմակերպության, «Կանանց ռեսուրսային կենտրոն», «Հույս և օգնություն» հ/կ-ների ներկայացուցիչների կարծիքով, 141-րդ հոդվածն է:

Նշենք, որ, համաձայն այդ հոդվածի՝ տասնութ տարին լրացած անձի կողմից սեռական հարաբերությունը կամ սեքսուալ բնույթի այլ գործողություններ կատարելն ակնհայտ տասնվեց տարին չլրացած անձի հետ ՝ բռնաբարության, սեքսուալ բնույթի գործողությունների, և այդ գործողությունները հարկադրելու բացակայության դեպքում՝ պատժվում է տուգանքով՝ նվազագույն աշխատավարձի հարյուրապատիկից երկու հարյուր հիսնապատիկի չափով, կամ ազատազրկմամբ՝ առավելագույնը երկու տարի ժամկետով:

Սա նշանակում է, որ հանցագործին կարող է որպես պատիժ նշանակվել 100.000- 250.000 դրամ տուգանք:

«Մինչև այսօր դատական պրակտիկայում հիմնականում կիրառում են մինիմալ տուգանքը և հազվադեպ են ենթարկում ազատազրկման»,- ասում է ՀՀ գլխավոր դատախազության իրավական ապահովման և եվրաինտեգրման բաժնի ավագ դատախազ Արթուր Ղամբարյանը:

Նա, ինչպես նաև դատական դեպարտամենտի քրեական գործերի մասնագետ Հայկ Հարությունյանը, համաձայն են «Կանանց ռեսուրսային կենտրոն» հ/կ-ի կողմից առաջարկված ՀՀ քրեական օրենսգրքում փոփոխություններ ու լրացումներ կատարելու փաթեթի այն դրույթի հետ, որի համաձայն պետք է հանվի տուգանքը որպես պատժամիջոց և կիրառվի միայն կալանքը, որն էլ իր հերթին պետք է խստացվի`հասնելով 3-6 տարվա:

Հիշեցնենք, որ 141 հոդվածով էր, որ Երևանի Նուբարաշենի թիվ 11 հատուկ դպրոցի աշակերտների նկատմամբ անառակաբարո գործողություններ կատարելու մեջ մեղադրվող նույն դպրոցի հայոց լեզվի ուսուցիչ Լևոն Ավագյանը նախորդ տարի 1,5 տարվա ազատազրկման դատապարտվեց:

Ղամբարյանի հավաստմամբ 2009թ. 18 նման դեպք է արձանագրվել, որոնցից միայն 3-ի դեպքում է մեղավորը ազատազրկվել, իսկ մնացած դեպքերում կիրառվել է 100.000 դրամ տուգանքը: 2010թ. տվյալները պարզ չեն, բայց ամեն դեպքում Ղամբարյանը հավաստում է, որ նման հանցագործություններն ավելի շատ թաքնված բնույթ են կրում:

«Եթե մենք նմանատիպ գործողություններով շարունակենք դատական քաղաքականության նկատմամբ նման ներողամտություն ցուցաբերել, մենք վաղը չէ մյուս օրը կունենանք մեծ պարարտ հող եվրոպացի պեդոֆիլների համար Հայաստանի հանրապետության տարածք ժամանելու համար և ամերիկացի»,- համոզված է Ղամբարյանը:

Այսինքն՝ մասնագետը կարծում է, որ արտասահմանյան երկրների բնակիչները, ում համար ավելի խիստ պատիժներ են սահմանված իրենց երկրում, կգան Հայաստան, որտեղ ավելի «մեղմ» են վերաբերվում նման հանցագործություններին:

«Երեխաների թրաֆիքինգի կանխարգելումը Հայաստանում» ծրագրի ղեկավար Տաթևիկ Բեժանյանը մտահոգություն հայտնեց, որ սեռական հանցագործությունները անչափահասների նկատմամաբ շարունակվում են` անդրադառնալով հունվարի 31-ին www.hetq.am-ի հրապարակմանը:

«Համոզված եմ, որ առաջին հերթին Հայաստանում պետք է դադարեն հանցագործին պաշտպանելը և զոհին մեղավոր դարձնելը»,- համոզված է Բեժանյանը:

Կարինե Իոնեսյան

Աղբյուր՝ www.hra.am