Դեկտեմբերի 16-ին տեղի ունեցավ «Պայքար խոշտանգումների դեմ. դատավորների և դատախազների համար նախատեսված ձեռնարկ»-ի հայերեն տարբերակի շնորհանդեսը: Ձեռնարկը պատրաստել է Էսեքսի համալսարանի մարդու իրավունքների կենտրոնը. այն հայերեն է թարգմանվել «Քաղաքացիական հասարակության ինստիտուտ» հասարակական կազմակերպության կողմից Խոշտանգումների կանխարգելման ասոցիացիայի օժանդակությամբ:

Ձեռնարկի շնորհանդեսին հաջորդեց խոշտանգումների դեմ պայքարին ուղղված հարցերի վերաբերյալ քննարկումը: Միջոցառումը վարեցին միջազգային փորձագետներ Մեթյու Փրինգլը (Շվեյցարիա) և Մայքլ Քելլեթը (Մեծ Բրիտանիա), ինպես նաև «Քաղաքացիական հասարակության ինստիտուտ» ՀԿ նախագահ Արման Դանիելյանը (Հայաստան):

«Խոշտանգումների հիմնական պատճառն այն է, որ իրավապահ մարմինները բավականաչափ պրոֆեսիոնալիզմ չունեն համապատասխան հետաքննություններ իրականացնելու,  և հաշվի առնելով, որ նրանց վրա ճնշում է գործադրվում արդյունքներ ներկայացնելու համար, նրանք խոստովանություն ստանալու, հանցագործությունը հայտնաբերելու  և իրենց ղեկավարներին երջանկացնելու համար ամենահեշտ ճանապարհն են համարում խոշտանգելը»,- ասում է միջազգային փորձագետ Մայքլ Քելլեթը, որը 30 տարի աշխատել է Մեծ Բրիտանիայի իրավապահ համակարգում որպես ոստիկան:

«Քաղաքացիական հասարակության ինստիտուտ» ՀԿ նախագահ Արման Դանիելյանի խոսքերով՝ խոշտանգումների դեմ պայքարը խիստ արդիական է մեր երկրի համար. այն չի կատարվում այն ծավալով, որով պետք է կատարվի:

«Այս ամոթալի երևույթը Հայաստանում ծաղկում է:  Եվ, ցավոք սրտի, այն մարդիկ, ովքեր պետք է պայքարեն դրա դեմ, չեն պայքարում այնպես, ինչպես պետք է պայքարեն, ինչն էլ խրախուսում է խոշտանգումը մեր երկրում»,- ասաց Արման Դանիելյանը:

Աննա Բարսեղյան

Աղբյուրը՝ www.hra.am