Մարդու իրավունքների միջազգային ֆեդերացիայի համաժողովի վերջին նիստը տեղի է ունենում «Արմենիա Մարիոթ» հյուրանոցի սրահներից մեկում, որտեղ ՀԱԿ համակիրներն ու իրավապաշտպանները կազմակերպել են հերթական բողոքի ակցիան՝ հյուրերին եւս մեկ անգամ հիշեցնելու Հայաստանում քաղբանտարկյալների առկայության մասին:

Եռօրյա ակցիաների կազմակերպիչ' Քաղբանտարկյալների եւ քաղհալածյալների կոմիտեի ներկայացուցիչ Վարդան Հարությունյանն ասում է, որ իրենց նախաձեռնած ակցիաները  արդյունք տվել են։.

«Համաժողովի մասնակիցները եկան, մասնակցեցին ընդդիմության հանրահավաքին: Իշխանության առաջ բարձրացրեցին քաղբանտարկյալների խնդիրը»:

Վարդան Հարությունյանը այն իրավապաշտպաններից մեկն է, որը հրաժարվել է մասնակցել համագումարին։.

«Եթե չլիներ այս ամբողջ աղմուկը, բոյկոտողների ճնշումները, չբոյկոտողների ակտիվությունը, չէր լինի այն, ինչ եղավ: Մենք հասանք մեր նպատակին: Այն աղմուկը, որ բարձրացվել էր, ճնշում էր եւ աշխատեց»:

Իսկ Կառավարության շենքի առաջ հերթական լուռ բողոքի ակցիան էին անում իրացման գոտու բնակիչներն ու խաղաղ պայմաններում զորամասերում սպանված զինվորների ծնողները: Նրանք Մարդու իրավունքների միջազգային ֆեդերացիայի նախագահին են ներկայացրել իրենց բողոքները:

 «Սեփականության իրավունքի պաշտպանություն» ՀԿ նախագահ Վաչագան Հակոբյանն ասում է, որ իրենց խնդիրը ներկայացնող ֆիլմը տրամադրել են ՄԻՄՖ-ին:

«Օրինակ, երեկ մեր մյուս խմբին է ընդունել Երևանի քաղաքապետի տեղակալ Կարո Արեյանը և դժգոհել, թե ինչու են գնացել: Ասում է' իմացեք, ով գողացել է, նրանից վերցրեք: Ասում է' բյուջեում փող չունենք, այստեղ էլ չգաք: Բեգլարյանը մի տարի տարավ, բերեց , ասում է' ես իրավասու չեմ: Այս իշխանությունները մինչեւ չգնան, մենք ոչ մի բանի չենք հասնելու»,-ասում է Հակոբյանը։

Իսկ սպանված զինվորի մայր Գոհար Սարգսյանն էլ հավելեց, թե իրենք ՄԻՄՖ նախագահին ներկայացրել են իրենց որդիների սպանությունների պատմությունը։

«Այս պետությունն է խախտել մեր որդիների իրավունքները, որովհետև այսօր մենք ունենք միայն գերեզմանաքար, սպանության փաստ, բայց չունենք մեղավորներ: Ասաց, թե հետամուտ կլինի, որ պատժվեն իրական մեղավորները։