Դատական ակտերի հարկադիր կատարման ծառայության ձեռքով այսօր կնքվեց Աբովյան փողոցում գտնվող Միլանո վաճառասրահի (Օլիմպ ՍՊԸ) դուռը։ Չնայած տարածքը լքելու համար ԴԱՀԿ ծառայության աշխատակիցները մինչև մարտի 12-ը ժամանակ էին տվել Օլիմպ ՍՊԸ-ի սեփականատերերին, սակայն չհամբերեցին, առավոտ շուտ եկան ու նրանց վտարեցին։ Տարածքի իրական սեփականատերը՝ Հովհաննես Ղուկասյանը մոլորվել մնացել էր և չէր միջամտում վտարման գործընթացին։  

ԴԱՀԿ աշխատակիցները թույլ չէին տալիս, որ լրագրողները մտնեին խանութ ու ներկա գտնվեին գույքահաշվարկի ու դրա գնահատման գործընթացին։ Մուտքը խանութի տարածք արգելված էր, և լրագրողները մի քանի ժամ նկարահանումները կատարում էին ապակիների հետևից:

Խանութի սեփականտեր Հովհաննես Ղուկասյանի ներկայացուցիչ Տիգրան Հայրապետյանի խոսքով  իրենք  գիշերը 12-ին են ստացել վտարման մասին ծանուցագիրը և հնարավոր չէր ոչ աշխատանքային ժամերին խանութի հագուստը տեղափոխել։

Հովհաննես Ղուկասյանին  սեփական տարածքից վտարում են ոչ միայն որպես  «Օլիմպ» ՍՊԸ-ի սեփականատեր, այլև որպես ֆիզիկական անձ՝ իր տնից։ Չնայած վտարման գործընթացին' Ղուկասյանը պատշաճ փոխհատուցում դեռևս չի ստացել  տարածքի նոր սեփականաիրոջից, ում հետ պետք է պայմանգիր կնքեր։

Կարագուլյանը Ղուկասյանին առաջարկում էր փոխհատուցում երկհարկանի կառույցի միայն առաջին հարկի դիմաց՝ 125 քմ (200 մլն դրամ): Իսկ խանութը եռահարկ է' չհաշված տանիքը և նկուղը: Նա չի ստացել նաև նախատեսված 200 մլն դրամը։

ՓաստաբանՀայրապետյանն ասում է, որ եթե տարածքը համարվել է հանրային գերակա շահ, ապա սեփականատերը գոնե ողջամիտ ժամկետում պետք է հնարավորություն ունենար գումարը ստանալու, մեկ ուրիշ տեղ տարածք գնելու և տեղափոխվելու։

«Համաձայն Սահմանադրության 31 հոդվածի և հասարակության ու պետական կարիքների համար սեփականության օտարման մասին օրենքի՝ եթե պետությունը վերցնում է քո տարածքը, պետք է լինի նախնական համարժեք փոխհատուցում, այսինքն գումարը տրվի սկզբում,-ասում է փաստաբանը,-Ընդ որում նույն օրենքով 2 ամիս ժամանակ է տրվում մինչև դուրս գալը, իսկ դատարանի նախագահը պահանջում է պայմանագիր կնքել, նոր գումարի փոխհատուցում ստանալ»։

Հովհաննես Ղուկասյանը փետրվարի 19-ին նամակով դիմել էր Սերժ Սարգսյանին ու տեղեկացրել իրեն «սեփականությունից ապօրինի զրկելու մասին»։ Սակայն նամակը մնացել է անարձագանք:

Փողոցի այն հատվածը, ուր գտնվում է «Միլանո» խանութը, ճանաչվել է հանրային գերակա շահ։ Տարածքի ձեռքբերող է ճանաչվել «Ավո Ֆ. Մ.Հ» ՍՊԸ-ն, որի ղեկավարը սփյուռքահայ Ավետիս Կարագուլյանն է։

Քրիստինե Վարդանյան