Այսօր ավարտվեց ԱԺ պատգամավոր Տիգրան Արզաքանցյանի' «Երկիր» օրաթերթի դեմ ներկայացրած զրպարտության և վիրավորանքի հայցի դատաքննությունը:

Հիշեցնենք, որ  Տիգրան Արզաքանցյանը դատի է տվել «Երկիր» օրաթերթին' իր պատիվն ու արժանապատվությունն արատավորող տեղեկություններ հրապարակելու համար: «Երկիր»-ի «131 դեմք ու դիմակ» խորագիրը ներկայացնում է ԱԺ 131 պատգամավորներին. այս տարվա հունվարի 13-ի համարի հերթական հոդվածը ԱԺ պատգամավոր Տիգրան Արզաքանցյանի մասին էր:

Պատգամավորի կարծիքով՝ «ստիլյագա», «Քյավառա բարբառով խոսող» արտահայտությունները վիրավորական են,  իսկ  պնդումները, թե նա «ռուս գեղեցկուհիներ է Հայաստան տանում-բերում», «կազինոների մշտական հաճախորդ է», «ծեծ ուտելու սովորություն ունի» արտահայտությունները «զրպարտություն» է ։

Դատական նիստում պատգամավորի փաստաբան Վահե Հովսեփյանն  ամբողջությամբ պնդեց հայցը' պահանջելով պարտավորեցնել «Երկիր» թերթին հրապարակել պատգամավորի պատասխանը, ինչպես նաև՝ պատիվն ու արժանապատվությունը արատավորող տեղեկություններ հրապարակելու համար որպես փոխհատուցում վճարել 3 միլիոն 568 հազար դրամ: ԱԺ պատգամավորի ներկայացուցիչը բազմիցս կրկնում է, որ եթե օրենքով նախատեսված լիներ առավելագույնը 10 մլն դրամի փոխհատուցում, ապա նրանք կպահանջեին առավելագույնը։ 

«Դատաքննությունն անցավ նորմալ, ես ակնկալում եմ, որ հայցը կբավարարվի»,- ասաց փաստաբան Վահե Հովսեփյանը։  

«Երկիր» թերթի  ներկայացուցիչները ևս ամբողջությամբ պնդեցին իրենց պատասխանը' Արզաքանցյանի պահանջները որակելով հիմնազուրկ:

«Ես կարծում եմ՝ դատաքնննությունը նորմալ անցավ, ներակայցվեց այն, ինչ պետք է ներկայացվեր։ Հույս ունեմ, որ կկայացավի արդար վճիռ՝ հաշվի առնելով  ներկայացված հանգամանքները։ Տվյալ հրապարակման մեջ ես դժվարանում եմ գտնել վիրավորանք կամ զրպարտության տարրեր. դա հայցվորի սուբյեկտիվ մոտեցումն ու ընկալումն է»,- իր կարծիքը կիսեց «Երկիրի» ներկայացուցիչ, փաստաբան Լիանա Գրիգորյանը։

Դատավոր Ռ. Ափինյանը վճիռը կհրապարակի հունիսի 8-ին:

Աղավնի Եղիազարյան
Աղբյուրը՝ www.hra.am