Եթե նույնիսկ քաղաքապետը տրանսպորտի սակագինը փոփոխելու մասին որոշում կայացրել է, ապա այն դեռևս չի կարող համարվել ուժի մեջ մտած, քանի որ օրենքով սահմանված կարգով չի հրապարակվել և ուժի մեջ չի մտել։

Քիչ առաջ Երևանի քաղաքապետարանի պաշտոնական կայքում տեղադրվեց «Երևան քաղաքի ներքաղաքային ուղևորափոխադրումների վարձը վերանայելու մասին» քաղաքապետի 19.07.2013թ. 3661-Ա որոշումը, որով սահմանվում է ավտոբուսային և միկրոավտոբուսային ուղևորափոխադրումների վարձը՝ 150 դրամ, տրոլեյբուսինը՝ 100 դրամ։

Շեշտենք, որ որոշումը կայքում տեղադրվեց հուլիսի 24-ին ժամը 16։00-ի սահմաններում, մինչդեռ արդեն երկու օր է շրջանառվում էր այն վարկածը, որ ուղեվարձի թանկացումն ապօրինի է, քանի որ չկա քաղաքապետի համապատասխան որոշումը, որը պետք է հրապարակվի և ուժի մեջ մտնի օրենքով սահմանված կարգով։

Ինչո՞ւ որոշումը չհրապարակվեց անմիջապես, երբ քաղաքապետարանը հայտարարեց սակագնի փոփոխության մասին, այլ հրապարակվեց կայացվելուց 6 օր անց։

Որոշումը դեռևս չի կարող համարվել ուժի մեջ մտած

«Իրավական ակտերի մասին» ՀՀ օրենքի 56-րդ հոդվածի 1-ին մասին համաձայն՝ Տեղական ինքնակառավարման մարմինների նորմատիվ իրավական ակտերը ենթակա են պարտադիր պաշտոնական հրապարակման և ուժի մեջ մտնում են բացառապես պաշտոնական հրապարակման օրվան հաջորդող 10-րդ օրը, եթե ավելի ուշ ժամկետ սահմանված չէ:

Նույն օրենքի 63-րդ հոդվածի 3-րդ մասի համաձայն՝ որոշումները հրապարակվում են «Երևանի իրավական ակտերի տեղեկագրում» դրանք ստանալու օրվան հաջորդող տասը օրվա ընթացքում:

Իրավական բոլոր ակտերի պաշտոնական հրապարակման համար պատասխանատու «Պաշտոնական տեղեկագիր» ՓԲԸ տրամադրած տեղեկատվության համաձայն՝ հուլիսի 23-ի դրությամբ Երևանի ներքաղաքային տրանսպորտի փոխադրավարձերի ավելացման վերաբերյալ որոշում պաշտոնական տեղեկագրերում հրապարակված չէ:

Քաղաքապետի 19 հուլիսի 2013թ. 3661-Ա որոշումը հուլիսի 23-ի դրությամբ հրապարակված չի եղել նաև քաղաքապետարանի պաշտոնական կայքում, Հայաստանի իրավական տեղեկատվական համակարգի www.arlis.am, www.laws.am, www.legislation.am կայքերում:

Ուստի տրանսպորտի ուղևորափոխադրումների նոր սակագները չեն կարող օրինական համարվել, քանի որ քաղաքապետի որոշումը օրենքով սահմանված կարգով չի հրապարակվել և ուժի մեջ չի մտել։

ՄԻՊ–ը՝ Տարոն Մարգարյանին. «Արդյո՞ք Դուք ստորագրել և օրենքով նախատեսված ձևով հրապարակել եք նման որոշում»

Այսօր՝ առավոտյան հայտարարություն էր տարածել Մարդու իրավունքների պաշտպան Կարեն Անդրեասյանը՝ քաղաքապետ Տարոն Մարգարյանին ուղղելով մի քանի հարցադրում՝

1. Ներքաղաքային տրանսպորտի սակագների թանկացումը հնարավոր է բացառապես Երևանի քաղաքապետի որոշման առկայության դեպքում: Արդյո՞ք Դուք ստորագրել և օրենքով նախատեսված ձևով հրապարակել եք նման որոշում և եթե՝ ոչ, ապա ակնհայտ չէ՞, որ առանց պատշաճ հրապարակման նման որոշում իրավաբանորեն գոյություն չունի:

2. Առանց քաղաքապետի որոշման տրանսպորտի սակագները բարձրացրած բոլոր ուղևորափոխադրող ընկերությունները ենթարկվելու՞ են պատասխանատվության:

3. Եթե գործող ուղևորափոխադրող ընկերությունները դիմել են տրանսպորտի սակագնի բարձրացման խնդրանքով, ապա անհրաժեշտ չէ՞, արդյոք, հայտարարել նոր մրցույթ, որին հնարավոր է մասնակցեն նոր ընկերություններ՝ 100 ՀՀ դրամ սակագնի առաջարկով:

Պաշտպանը հավելել էր, որ տրանսպորտի սակագների թանկացման որոշումն անթույլատրելի է առանց պատշաճ հանրային քննարկման, բայց առավել դատապարտելի է, երբ նման թանկացումը կատարվում է օրենքի կոպիտ խախտումներով: