Դատարանն ուսումնասիրեց Արտակ Նազարյանի մահվան գործով վկա Արթուր Մկրտչյանի հարցազրույցի տեսագրությունը. հարցազրույցի որ հատվածը գործին կկցվի՝ որպես ապացույց, դատավոր Մարդանյանը կորոշի դատավարության հաջորդ փուլերում։

Հունիսի 6-ին Տավուշի մարզի ընդհանուր իրավասության դատարանում շարունակվեց պայմանագրային զինծառայող, լեյտենանտ Արտակ Նազարյանի մահվան գործով դատական նիստը, որի ընթացքում հետազոտվեց վկա Արթուր Մկրտչյանի «Ազատություն» ռադիոկայանի թղթակցին տված հարցազրույցի տեսագրությունը:

Այդ հարցազրույցում Արթուր Մկրտչյանն ասում է, որ քննիչները Բերդի ոստիկանությունում իրեն ծեծել են, որ Մադաթյան Սաքոն և մեկ ուրիշը, որի անունը չէր հիշում, ծեծելով իրեն ստիպել են կեղծ ցուցմունք տալ, և հավելում է՝ «տղերքը մեղավոր չեն»: «Տղերքը» ասելով՝ նա ի նկատի ունի գործով ամբաստանյալներ Ադիբեկ Հովհաննիսյանին, Մխիթար Մխիթարյանին և Հարութիկ Կիրակոսյանին:

Հարցազրույցում Ա. Մկրտչյանը վկայում է , որ Ռազմական ոստիկանությունում ծեծել են գործում ներգրավված բոլոր զինծառայողներին, այդ թվում՝ ամբաստանյալ կապիտան Հակոբ Մանուկյանին: Վերջինիս պաշտպան Հրանտ Գևորգյանը հայտարարեց, որ հարցազրույցում Ա. Մկրտչյանի արած այն պնդումները, թե Հակոբ Մանուկյանը մի քանի անգամ ծեծել է Արտակ Նազարյանին, ճիշտ չեն, իր պաշտպանյալը Ա. Նազարյանին չի ծեծել. նրանք վիճել են որպես հավասար կողմեր և այդ վեճերը չէին կարող Ա. Նազարյանին ինքնասպանության մղել:

Հրանտ Գևորգյանը՝ նշելով, որ վկա Արթուր Մկրտչյանը 31 օր անազատության և ճնշման տակ է եղել, անազատության մեջ եղել է նաև նրա եղբայրը դատարանում հայտարարեց. «Դուք ինքներդ գիտեք, որ դատարան գործ եք բերել այն պարագայում, երբ վկաներին հարցաքննել եք, ապացույցներ եք կորզել անմարդկային պայմաններում: Ես չեմ որպես իրավաբան ձեզ չհիշեցնելու և Եվրոպական կոնվենցիան, և ՄԱԿ-ի կոնվենցիան, և ՀՀ սահմանադրությունն ու Քրեական դատավարության օրենսգրքի համապատասխան նորմերը»:

Պաշտպանը դատարանին միջնորդեց ձայնագրության այն հատվածը, ուր Ա. Մկրտչյանը հայտարարել է Ռազմական ոստիկանությունում ծեծի և ճնշման ենթարկվելու մասին, ճանաչել որպես ապացույց: Ամբաստանյալ 3 զինվորների պաշտպան Ալվարդ Մնացականյանն էլ միջնորդեց տեսաերիզը կցել գործին, քանի որ վկան հարցազրույցի ժամանակ անկաշկանդ պատասխանելով լրագրողի հարցերին, հայտարարել է՝ ամբաստանյալ զինծառայողներն անմեղ են:

Մեղադրողներ Հայկ Հարոյանը և Հարություն Հարությունյանը դեմ էին տեսաերիզը որպես ապացույց գործին կցելուն: Նրանց խոսքերով՝ այդ հարցազրույցը վկան տվել է ամբաստանյալների ծնողների ճնշման տակ, որ Ա. Մկրտչյանը ճշմարտությունն ասել է դատարանում, ուր նա ստորագրել է սուտ ցուցմունք տալու դեպքում պատասխանատվության ենթարկվելու վերաբերյալ:

Գործով առանցքային մյուս վկայի՝ Արման Մնացականյանի վերաբերյալ դատարանը ոստիկանության Վաղարշապատի բաժնի պետից գրություն էր ստացել. Մնացականյանը ամբուլատոր բուժման մեջ է՝ սրտի ռիթմի խանգարման պատճառով:

Տուժողի իրավահաջորդի ներկայացուցիչ Ռուբեն Մարտիրոսյանը դատարանին միջնորդեց ստուգել, իր կարծիքով, առողջ և առույգ վկա Արման Մնացականյանի առողջական վիճակը՝ բժշկական հանձնաժողովի փորձաքննությամբ:

Ամբաստանյալ կապիտան Հակոբ Մանուկյանի պաշտպան Հրանտ Գևորգյանն էլ դատարանին միջնորդեց դատատեսաձայնագրային փորձաքննության ենթարկել գործով վկա Արման Մնացականյանի հարցաքննության տեսաերիզը:

Իրավապաշտպան Ռուբեն Մարտիրոսյանը միջնորդություն ներկայացրեց նաև դատական նիստերն արտագնա կարգով Երևանում անցկացնելու վերաբերյալ, քանի որ գործում ներգրավված բոլոր կողմերի համար այդպես ավելի հարմար է, Երևանում նիստերն ավելի հաճախակի կանցկացվեն:

Դատավոր Մարդանյանն իր աշխատանքային ծանրաբեռնվածության պատճառով մերժեց նիստերը Երևանում անցկացնելու միջնորդությունը, ասելով, որ հետագայում ևս կարող են անդրադառնալ այդ միջնորդությանը:

Հրանտ Գևորգյանի՝ դատատեսաձայնագրային փորձաքննություն անցկացնելու վերաբերյալ և Ռուբեն Մարտիրոսյանի՝ Արման Մնացականյանի առողջական վիճակը բժշկական հանձնաժողովի կողմից ստուգելու մասին միջնորդությունների մասին դատարանը որոշում կկայացնի դատավարության հետագա փուլերում:

Դատաքննությունը կշարունակվի հունիսի 12-ին:

Ոսկան Սարգսյան

Իջևան