«Նախորդ Ազգային ժողովում հնչում էր միայն մեկ կուսակցության՝ «Ժառանգության» ձայնը, իսկ Հայ ազգային կոնգրեսը նույն բողոքը արտահայտում էր դրսում, քանի որ, եթե քաղաքականությունը չեն թողնում քաղաքականության մեջ մտնի, այն հնչում է դրսում»,- կարծում է Ալեքսանդր Իսկանդարյանը՝ Կովկասյան ինստիտուտի ղեկավարը:

Այսինքն՝ այս տարի Ազգային ժողովը շատ ավելի հետաքրքիր տեսք է ստացել քաղաքագետների համար, քանի որ հայտնվել են երկու ընդդիմադիր ներկայացուցիչներ ու իրավիճակն ավելի կարող է հետաքրքիր դառնալ, եթե «Բարգավաճ Հայաստան» կուսակցությունն իշխանության հետ կոալիցիա չկազմի:

«Ինձ այժմ ամենաշատը հետաքրքրում է այն հարցը, թե Բարգավաճ Հայաստան կուսակցությունը կմիանա՞ արդյոք իշխող կուսակցությանը, թե՝ ոչ: Միայն հստակ է, որ ՕԵԿ-ն անպայման կհամագործակցի ՀՀԿ-ի հետ»,- նշում է Իսկանդարյանը:

Մեր այն հարցին, թե արդյոք «Ժառանգություն» կուսակցության ներկայացուցիչների փոփոխությունը կազդի նրանց դիրքորոշումների վրա Ազգային ժողովում, Իսկանդարյանը նշեց, որ «Ժառանգությունը» ինչ դեր խաղացել է, կշարունակի խաղալ.

«Ուղղակի կսկսի արդեն մրցակցություն ՀԱԿ-ի հետ»,- կարծում է Իսկանդարյանը:

Չնայած նրան որ ՀԱԿ-ն արդեն հայտարել է չորսօրյա հանրահավաքների մասին, Իսկանդարյանը չի կարծում, որ կլինեն լուրջ բախումներ այս ընտրություններից հետո, ինչպես եղավ ՀՀ նախագահական ընտրությունների ժամանակ: Եթե բախում լիներ, կլիներ ընտրությունների հաջորդ օրը:

«Այս տարվա ներկայացուցիչներն ավելի շատ կպաշտպանեն իրենց կուսակցության իրավուքնները, ոչ թե սեփական բիզնեսի իրավունքները, նախորդ տարի սեփական բիզնեսը պաշտպանողներն ավելի շատ են եղել»,- ասում է Իսկանդարյանը:

Չնայած նրան, որ լրագրողների աշխատանքը ողջունվեց միջազգային կազմակերպությունների կողմից, Իսկանդարյանը ընտրությունների ավարտին էլ արձանագրում է, որ լրագրողներն այդպես էլ չեն հնչեցրել «ինչպե՞ս» հարցը՝ թույլ տալով թեկնածուներին խուսափել լուրջ հարցերի պատասխանելուց: