2011թ. հունիսի 9-ին ՀՀ արդարադատության նախարարության քրեակատարողական հիմնարկներում և մարմիններում հասարակական վերահսկողություն իրականացնող հասարակական դիտորդների խումբը ;հրատապ հաշվետվություն է ներկայացրել ՀՀ արդարադատության նախարարին' պատիժը կրելուն խոչընդոտող ծանր հիվանդություններ ունեցող 5 դատապարտյալների' 3–ը «Աբովյան» քրեակատարողական հիմնարկից, 2 հոգի՝ «Դատապարտյալների հիվանդանոց» քրեակատարողական հիմնարկից:

«Բժշկական  առողջապահական հանձնաժողովի /ԲԱՀ/ կողմից հաստատվել է այդ դատապարտյալների հիվանդությունների բժշկական ախտորոշումները, սակայն, քանի որ միջգերատեսչական հանձնաժողովի գործունեության ընթացակարգը հստակեցված չէ, հիվանդների ազատ արձակման խնդիրը ձգձգվում է անորոշ ժամանակով»,- ասվում է ՀՀ ԱՆ ՔԿՀ հասարակական վերահսկողություն  իրականացնող հասարակական դիտորդների խմբի հայտարարությունում:  

Մինչ այժմ ՀՀ արդարադատության նախարարության կողմից որևէ պատասխան խումբը չի ստացել, այդ պատճառով, համաձայն  ՀՀ արդարադատության նախարարության  քրեակատարողական հիմնարկներում և մարմիններում հասարակական վերահսկողության իրականացման Կարգի 13-րդ կետի հրապարակվում է խմբի  հրատապ հաշվետվությունը, միաժամանակ  վերստին պահանջելով ՀՀ արդարադատության նախարարից հրատապ լուծելու դատապարտյալներին պատժից ազատելու խնդիրը, քանի որ նրանց պատժի հետագա կրումը գնահատում ենք որպես դատապարտյալների նկատմամբ անմարդկային վերաբերմունք:

Աղբյուրը՝ www.hra.am