Ընտրությունների ընթացքում առաջացող բոլոր խնդիրների, ինչպես նաեւ նկատելի խախտումների դեպքում խնդրում ենք զանգահարել թեժ գիծ՝ անվճար իրավական խորհրդատվության համար։ Անհրաժեշտության դեպքում Արագ արձագանքման խումբը օգնություն կտրամադրի տեղում։

Օրվա ընթացքում թեժ գծի ողջ աշխատանքը կլուսաբանվի www.hra.am-ի կողմից։ Խնդրում ենք հետեւել մեր կայքի աշխատանքներին։

Այսօր առավոտյան ժամը 8։00–ին արագ արձագանքման մեքենաները սկսեցին իրենց աշխատանքը։ 20 մեքենաներ մեկնեցին քաղաքի տարբեր թաղամասեր։ Յուրաքանչյուր մեքենա համալրված է հետևյալ կազմով` մեկական իրավաբան, դիտորդ, ակտիվիստ և լրագրող: Մեքենաների աշխատանքները համակարգվում են թեժ գծի աշխատակազմի կողմից՝ ընդունվող զանգերին համաձայն։

21:35
Ընտրող Ալինա Խառատյանը գնացել է 9/03 տեղամաս 19:30 եւ հայտնաբերել է, որ իր անվան դիմաց ստորագրել են, դիմել ե հանձնաժողովի նախագահ Կարեն Հովհանիսյանին, ՀՀԿ ներկայացուցիչ, նախագահը հրաժարվել է արձանագրություն կազմելուց, ձգձգել է մինչեւ ընտրությունների ավարտը, սպառնացել ընտրողին, որ իր դեմ արձանագրություն կկազմվի, որ ընտրությունը ինքն է կատարել եւ ինքն է ստորագրել։ Ընտրողը գնացել է ոստիկանությունը, սակայն ոստիկանությունը չի ընդունել բողոքը։ Այս հարցը լուսաբանվել է «Ժամանակ» թերթի լրագրողի կողմից, որը ներկա է գտնվել այս միջադեպին

21:30
Հարց՝ Կարո՞ղ է արդյոք հանձնաժողովի անդամը ստորագրության փոխարեն արձանագրության մեջ դնել անձնական կնիք:
Պատասխան՝ Ոչ

20:55
4/21 տեղամասում հրաժարվել են հայտնել ընտրողների վերջնական քանակը, ասելով, որ մինչեւ վերջնական հաշվարկ չկատարեն, չեն հայտնի:

20:50
8/24 ընտրատարածքը որոշ ժամանակվա ընթացքում շրջապատված է եղել կարմիր բերետավորների կողմից, որոնք որոշ ժամանակ հետո լքեցին ընտրատարածքը: Դա նույն ընտրատարածքն է, որտեղից քիչ առաջ տեղեկություն ստացանք այն մասին, որ կորել է երկու կապոց քվեաթերթիկ:

20:40
Ահազանգ ստացանք IWPR-ի ներկայացուցիչ, լրագրով Մանուշակ Թավրիզյանից, որը ըստ  օրենքի իրավունք ունի մասնակցել ընտրությունների արդյունքների հաշվարկին: Սակայն  լրագրողին ուժ գործադրելով դուրս են հանել 08/01 տեղամասից: 08/02 տեղամաս նրան նույնպես չեն թողել:

20:40
Ահազանգ՝ 5/10, 5/9 ընտրատեղամասում մի խումբ անձինք փորձում են մուտք գործել ընտրատեղամաս:

20:20
Ահազանգ է ստացվել, որ 8/24 տեղամասում երկու կապոց քվեաթերթիկ է կորել: Ընտրատարացքի ներսում այս պահին վեճ է ընթանում:

20:20
Մեր դիտորդը հայտնեց, որ 5/15 տեղամասը փակելուց հետո եկել են մի խումբ մարդիկ եւ լցոնում են կատարել:

20:15 145 դպրոցում գտնվող 5/27 տեղամասի փակվելուց հետո մի խումբ անձինք մուտք են գործել ընտրատեղամաս:

20:15
ՀԱԿ-ի թեկնածուն ահազանգեց, որ 5/10 տեղամասում լցոնում է տեղի ունեցել, լարված իրավիճակ է:

20:15
Հարց՝ Քվեարկությունը ավարտելուց հետո, դիտորդը իրավունք ունի՞ մնալ ձայների հաշվարկին:
Պատասխան՝ Այո, ունի:

19:55 8/18 20-րդ մեքենան է գնացել
30 մարդ մտել է ընտրատեղամաս, ահաբեկել են Հայկական ժամանակ-ի լրագրողին, այնուհետև եկել են ԵԿՄ-ի տղաները և ստիպել են նրանց հեռանալ ընտրատեղամասից:

19:50 Ահազանգ է ստացվել, որ 4/19 տեղամասում ցուցակները մատչելի չեն եղել, փակցված են եղել ընտրողների համար անհասանելի վայրում:

19:36 Ահազանգ է ստացվել, որ 10/20 տեղամասում, 114 դպրոցում տեղեկություններ կան, որ լցոնումներ են կատարել. Այս տեղեկությունը ժխտվել է:

19:30
Մեր խմբի լրագրողը հայտնեց, որ 8/18 տեղամասում մի կին բարձրաձայն քարոզում էր Հանրապետական կուսակցության օգտին, ասելով, որ լավ է անում, նրանք իր բարեկամներն են:

18:58 15 մեքենան հայտնում է, որ 1/11 տեղամասում դիտորդը հաղորդել է, որ առավոտյան ավտոբուսներով եւ երթուղային տաքսիներով հատուկ ցուցակով մարդկանց են բերել, որ քվեարկեն Հանրապետական կուսակցության օգտին:

18:17
Ահազանգ է ստացվել, որ 4/27 ընտրատեղամասում ՀԱԿ-ի վստահված անձը արձանագրել է, որ   որ քվեարկողը փորձել է քվեարկել ուրիշի փոխարեն: Ահազանգող ՀԱԿ-ի ներկայացուցչին ոստիկանությունը փորձում է հեռացնել ընտրատեղամասից: Ուղարկվել է 3-րդ մեքենան:

18:00 20-րդ մեքենան հայտնում է, որ 8/24 15 տղամարդ մտել են տեղամաս, կանգնել են հանձնաժողովի դիմաց: Մի հոգի քվեաթերթիկները լցրել է արկղը: Հանձնաժողովի անդամը փորձել է փակել արկղը եւ նրա ձեռքը վնասել են: Հանձնաժողովի նախագահը հերքում է այս տեղեկությունները: Դեպքի վերաբերյալ արձանագրություններ են կազմվել ՀԱԿ-ի եւ Դաշնակցության կողմից:

17:55 4/21 ընտրատեղամաս
3-րդ մեքենան հայտնում է, որ Քոչար փողոցում գտնվող Գայի դպրոցում լարված իրավիճակ է ՀՀԿ եւ ԲՀԿ կուսակցությունների ներկայացուցիչների միջեւ: 

17:42 15:50-ին թեժ գիծը հաղորդեց հետեւյալ լուրը՝
-4-րդ մեքենան հայտնում է, որ 142 դպրոցի մոտակայքում եղել են կրակոցներ, նախնական տեղեկությունների համաձայն ՀՀԿ հանձնաժողովի անդամը կրակել է ԲՀԿ անդամի վրա, որը վիրավորվել է: Առայժմ հնարավոր չէ պարզել, թե որտեղ է նա գտնվում:- /Մանրամասն տես 15:50-ի տեղեկությունը ստորեւ/
Քանի որ մենք բազմաթիվ զանգեր ենք ստանում այս միջադեպի վերաբերյալ, հարկ ենք համարում տալ հետեւյալ պարզաբանումները՝
ՀԱԿ-ի ներկայացուցիչ Լեւոն Զուրաբյանը հեռախոսով հաստատեց տեղեկության հավաստիությունը:
Մեզ զանգահարեց մի մարդ, որը ներկայացավ 142 դպրոցում տեղակայված ընտրատեղամասի հանձնաժողովի նախագահ, ասաց, որ այդպիսի միջադեպ չի եղել եւ պահանջեց հերքում տպագրել կայքում:
Բարգավաճ Հայաստան կուսակցության լրատվական ծառայությունը հեռախոսով հայտնեց, որ նմանատիպ տեղեկություններ նրանք չունեն:

17:43 Հարց՝ Տեղամասային ընտրական հանձնաժողովի անդամներին ո՞վ է նշանակում:
Տրվեցին պարզաբանումներ Ընտրական օրենսգրքի  37 հոդվածի դրույթների հիման վրա:

17:40 5 մեքենան հայտնում է, որ 11/22 ընտրատեղամասում ՀՀԿ եւ ԲՀԿ կուսակցությունների ներկայացուցիչների միջեւ վեճ է առաջացել, հատուկ ջոկատայինները գտնվում են այնտեղ: Այժմ իրավիճակը լարված է:

17.30 8/24 տեղամասում ժամը 17:15 սահմաններում ՀԱԿ վստահված անձանց Նահապետյան Մարինեյի եւ Կարինե Հարությունյանի, ինչպես նաեւ ՀՅԴ ներկայացուցիչ Վալերի Խաչատրյանի խոսքերով տեղի են ունեցել մասսայական լցոնումներ.
«Եկան 15-20 հաղթանդամ երիտասարդներ, փակեցին մեր դիմացը եւ իրենց վերնաշապիկի տակից ամեն մեկը հանեցին 15-20 քվեաթերթիկներ ու սկսեցին լցնել: Այդպես երկու հոգի լցրեցին մոտ 40 քվեաթերթիկ, երրորդ տղան, երբ ուզույմ էր լցնել, այդ ժամանակ մեր ներակայցուցիչը խոչընդոտեց փակելով  քվեատուփը, բայց նրանք այն փակեցին նրա ձեռքերի վրա»,- ասաց ՀԱԿ վստահված անձ Կարինե Հարությունյանը:
Մարինե Նահապետյանի մատներն են վնասել, բայց արդյունքում նա կարողացել է կանխել երրորդ տղայի կողմից կատարվող լցոնումը. «Պարզ էր, որ այդպես է լինելու, քանի որ այստեղ մինչեւ այդ դեպքը շատ էին լինում կուտակումներ»:
Լցոնման ժամանակ հանձնաժողովի նախագահը եւ տեղակալը տեղում չեն եղել: Վկաները կազմել են արձանագրություն, որտեղ նշել են նույնիսկ այն ավտոմեքենաների համարանիշները, որոնցով եկել էին այդ տղաները: Ավտոմեքենաների համարներն են`SL97023, SL40108, LU178, 07OS161:
«Մենք այստեղ չենք եղել ու չգիտենք թե ինչ է եղել: Մենք գնացել էինք, որ ցրեինք դրսում հավաքվածներին, բայց հետո աղմուկ լսեցինք, մինչեւ հասանք, ուշ էր»,- հայտնեց հանձնաժողովի նախագահ Սեդա Հակոբյանը:
Ամեն դեպքում նա հրաժարվել է այս դեպքը գրանցել մատյանում` նշելով, որ ինքը ականատես չի եղել: ՀԱԿ անդամներն ասում են, որ հուսով են հարցը կկարգավորվի 20:00-ից հետո, երբ ձայները հաշվարկեն:
«Պատճենը պետք է տարբերվի»,- ասաց Կարինե Հարությունյանը:

17:24 11 մեքենան հայտնում է, որ 5/7 ընտրատեղամասում ընտրողի ձեռքում կար 2 քվեաթերթիկ եւ 2 ծրար: Հանձնաժողովի անդամը նկատել է այդ, բայց ո՛չ քաղաքացին ո՛չ հանձնաժողովի անդամները չեն կարողացել բացատրություններ տալ այդ կապակցությամբ:

17:05 5-րդ մեքենան հյատնում է, որ 11/20, 11/21 տեղամասերում ժ.12-ի տվյալներով մեքենաներով մարդկանց են բերել եւ ընտրատեղամասերում 15 հոգուց ավել մարդ է եղել:

17:00 5-րդ մեքենան հյատնում է, որ Շենգավիթ համայնքի 11/19 տեղամաասում ընտրողի փոխարեն բոլոր տվյալները լրացված են եղել եւ ստորագրված:

16:58 9-րդ մեքենան բողոք է ստացել, որ 8/31 տեղամասում նույն անձը քվեարկել է 7 անգամ:

16:45 Հարց՝ Կարո՞ղ է արդյոք ավագանու թեկնածուն լինել նաեւ վստահված անձ:
Պատասխան՝ Օրենքով չի արգելվում:

16:45 10-րդ մեքենան հայտնում է, որ Յավրովի եւ Արզումանյան փողոցների ընտրատեղամասերում նկատվել են ոստիկանության ու քաղաքացիաների կուտակումներ:

16:30 Ահազանգ է ստացվել, որ 5/3 ընտրատեղամասում Զերոյան Դերենիկը հանդիսանում է միաժամանակ վստահված անձ եւ հանձնաժողովի անդամ, ինչը օրենքի խախտում է:

16:28 (երկու ահազանգ) 9/01, 9/02, 9/03 ընտրատեղամասերում կուտակումներ են նկատվել 4-րդ մեքենայի կողմից:

16:16 3-րդ մեքենան հայտնում է, որ 4/28 տեղամասում հանձնաժողովի անդամի եւ վստահված անձի միջեւ վեճ է առաջացել, որից հետո եկել են ջիպ մակնիշի մեքենաներ եւ առեւանգել են վստահված անձին:

16:10 1-ին մեքենա 10/31 տեղամաս
55 Չեխովի դպրոցի հետեւի մասում նկատվել է երթուղային տաքսիների կուտակում:

15:50 4-րդ մեքենան հայտնում է, որ 142 դպրոցի մոտակայքում եղել են կրակոցներ, նախնական տեղեկությունների համաձայն ՀՀԿ հանձնաժողովի անդամը կրակել է ԲՀԿ անդամի վրա, որը վիրավորվել է: Առայժմ հնարավոր չէ պարզել, թե որտեղ է նա գտնվում:
Սպորտ դպրոցի մոտ, որը գտնվում է 142 դպրոցի մոտակայքում, հավաքված են բազմաթիվ ոստիկաններ եւ հատուկ ջոկատավորներ եւ հարցերին պատասխանում են, որ ոչինչ տեղի չի ունեցել, եւ ընդամենը երեխաները խաղալիք պայթուցիկ են օգտագործել:

15:40 19 մեքենան հայտնում է, որ 7/14 տեղամասում մարդկանց մեծ կուտակումներ էին առաջացել: Դաշնակցության վստահված անձի կողմից արձանագրվել, որ ընտրողը խցիկից դուրս գալուց հետո ներկայացրել է դատարկ ծրար: Ընտրողը փախել է ընտրատեղամասից դուրս: Հանձնաժողովի նախագահը օպերատիվ ահազանգել է դրսում կանգնած ոստիկաններին, որոնք բռնել են այդ ընտրողին, ներս են բերել տեղամաս եւ նա իր գրպանից հանել եւ ներկայացրել է քվեաթերթիկը:Քվեարկած է եղել Բարգավաճ Հայաստան կուսակցության օգտին: Հանձնաժողովի կողմից կազմվել է համապատասխան արձանագրություն, եւ տվյալ քվեաթերթիկը ճանաչվել է անվավեր:

15:30 19 մեքենան հայտնում է, որ 7/12 տեղամասում (174 դպրոց) լցոնում ու կրկնակի քվեարկություն է եղել: Այդ պատճառով աղմուկ էր: Հանձնաժողովի նախագահը փորձել է հանդարտեցնել իրավիճակը եւ բոլոր կողմնակի անձանց դուրս հրավիրել տարածքից:

15:30 19 մեքենան հայտնում է, որ ահազանգ է եկել, որ 7/18 ՀԱԿ-ի վստահված անձին ծեծել են ու առեւանգել: 7/17-ի ՀԱԿ-ի եւ 7/18-ի Ժառանգության ներկայացուցիչները չեն հաստատել այդ տեղեկատվությունը: Մեր խմբի աշխատակիցները հանդիպել են Անահիտ Բախշյանին ու խնդրել են, որպեսզի նա ճշտի ստացված տեղեկությունը: Պարզվել է, որ տվյալ անձը ՀԱԿ-ի շտաբերից մեկում է գտնվում, քիչ անց անձամբ ներկայացել է եւ հերքել է այդ տեղեկությունը:

15:30 5 մեքենան հայտնում է, որ 12/17 տեղամասում ցուցակում գրված էր ազգանուն, որը գրանցված էր այլ տեղ: Դիտորդներն են պարզել, որ այլ տեղ է գրանցված:

15:25 16 մեքենան արձանագրել է, որ 1/1 տեղամասում մի կին տաքսիով բերում էր մեծահասակ ընտրողներին, զգուշացնում նրանց, որ ասեն, որ լավ չեն տեսնում եւ օգնության կարիք ունեն: Նույն կինը փոխանցել է այդ մեծահասակներին ինչ-որ ծրարներ: Խումբը արձանագրել է նաեւ, որ խցերը սխալ էին տեղադրված:

15:18 12 մեքենան հայտնում է, որ 5/15 տեղամասում Դաշնակցության ներկայացուցչին անպատվել են, ուրիշ Դաշնակցության ներկայացուցիչներ հավաքվել են, դրսում թաղապետի տեղակալը, որը դաշնակ է, ապտակել է ՀԱԿԻ-ի ներկայացուցչին:

15:10 Քաղաքացին խնդրել է ճշտել ընտրատարածքի տեղամասը:

15:07 14-րդ մեքենան հայտնում է, որ 3/05, 3/06 տեղամասերում ինչ-որ անձինք իրենց մոտ ցուցակներով ստուգում էին, թե ովքեր են ընտրել, եւ ասում էին, ով չի ընտրել, գնանք բերենք:

14:50 5-րդ մեքենան հայտնում է, որ 12/13 տեղամասում հետեւյալ խախտումն է արձանագրվել՝ առանց հանձնաժողովի նախագահի իմացության օգնություն է ցուցաբերվել քվեարկության ժամանակ:

14:20 18 մեքենան տեղեկացնում է, որ 7/21 տեղամասում աղմուկ ու կոնֆլիկտային իրավիճակ է տիրել: Հանձնաժողովի 2 ՀՀԿ-ի ներակայացուցիչ անդամ վիճաբանում էին ՀԱԿ-ի վստահված անձի հետ: Արձանագրություն է կազմվել, որ ՀԱԿ-ի ներկայացուցիչը խոչընդոտում է գործընթացին եւ կանչվել է ոստիկանություն: ՀԱԿ-ի վստահված անձը հայտնում է, որ տեղամասից դուրս կգա միայն, եթե իրեն ձերբակալեն: Հետո կանչվել են ավելի բարձրաստիճան ոստիկաններ, որոնք անցել են առանձին սենյակ վիճաբանողների հետ: Ներկա պահին պարզաբանումներ են ընթանում: Սենյակ ոչ մեկին չեն թողնում: Արագ արձագանքման խմբի աանդամները պարզել են, որ վիճաբանության պատճառը եղել է այն, որ մեքենաներով մոտ 30 քվեարկողներ են բերվել տեղամաս, որոնք պարզվել է, որ այդ տեղամասի բնակիչներ չեն:
14:35 UPDATE: Ոստիկանները որոշել են դուրս հանել ՀԱԿ-ի վստահված անձին: Վերջինս հայտարարել է, որ չնայած որոշումն անօրինական է, բայց քանի որ պահանջը ներկայացված է օրենքի ներկայացուցիչ՝ ոստիկանի կողմից, նա ենթարկվում է: Խումբը նաեւ տեղեկացնում է, որ արձանագրել է, որ քվեախցիկնեևը սխալ էին տեղադրված եղել, որի արդյունքում փաստացի ստացվում էր բաց քվեարկություն: Խմբի պահանջով հանձնաժողովի նախագահը տեղափոխել է խցիկները:

14:20 20 համարի մեքենան հայտնում է, որ 7/13 տեղամասի դիմաց կանգնած է 24 մակնիշի մեքենան վրան ՀՀԿ  դրոշներ, ինչը կարող է դիտարկվել որպես քարոզչություն:

14:15 3/01 ընտրատեղամասում 14 մեքենան հայտնում է, որ քվեախցիկը սխալ է տեղադրված եղել: Արագ արձագանքման խմբի պահանջով հանձնաժողովի նախագահը դժվարությամբ, բայց համաձայնել է տեղափոխել: Ոստիկանների սենյակի մուտքը հենց ընտրատեղամասում է, եւ նրանք պարբերաբար ելումուտ են անում:

14:13 համար 5 մեքենան տեղեկացնում է, որ 12/21 ընտրատեղամասում կան կուտակումներ, արագ արձագանքման մեքենայի հայտնվելուն պես մարդիկ ցրվել են:

13:45 համար 20 մեքենան տեղեկացնում է, որ 8/18 ընտրատեղամասում առավոտյան 8-ից մոտ 100 հոգի քվեարկել են եւ քվեաթերթիկները առանց ծրարների լցրել են քվեատուփի մեջ: ՀԱԿ-ի ու Դաշնակցության ներկայացուցիչները այս առիթով դիմել են հանձնաժողովի նախագահին, վերջինս սկզբում ոչինչ չի ձեռնարկել, եւ միայն այդ մարդկանց քվեարկելուց հետո համաձայնել է, որ այդպես չի կարելի:

13:44 համար 20 մեքենան տեղեկացնում է, որ 8/18 ընտրատեղամասում առավոտյան 7.40 մի աղջիկ խնդրել է, որ իրեն թույլ տան քվեարկել: ՀԱԿ-ի ներկայացուցիչը չի համաձայնվել, ու 8.00 այդ աղջիկը քվեարկել ու գնացել է: 10.30 նա նորից եկել է քվեարկելու, ՀԱԿ-ի ներկայացուցիչը նրան ճանաչել ու չի թույլատրել: Հանձնաժողովի նախագահն ասել է, որ դա նույն անձը չի, բայց անունը ցուցակում չկա:

13:25 2-րդ մեքենան արձանագրել է 9/14 ընտրատեղամասում լցոնման փորձ, որը կանխվել է:

13:23 8/32 ընտրատեղամաս
5-րդ մեքենան հայտնաբերել է առանց կնիքների չորս առանձին ընտրացուցակ, որոնց վրա ստորագրությունները կապույտով են, իսկ կնիքով ցուցակների վրա՝ սեւ գույնով:

13:15 14-րդ մեքենան 3/01 ընտրատեղամասում արձանագրել է, որ քվեախցերը սխալ են տեղադրված:

12:53 Հարց՝ Դիտորդը կարո՞ղ է օգնել ընտրողին քվեարկություն կատարելու համար, եթե թույլ է տվել հանձնաժողովի նախագահը:
Պատասխան՝ Այո: Սահմանափակումը վերաբերվում է միայն վստահված անձին: Նույն անձը կարող է օգնություն ցուցաբերել միայն մեկ անգամ:

12:48 2/33 ընտրատեղամասից հայտնում են, որ մարդիկ արտագրում են մարդկանց անունները ու հասցեները:

12:41 8/13 տեղամասում երթուղային տաքսիներով մարդկանց տեղափոխում են: Այլ խախտում չի նկատել:

12:37 Հարց՝ Ավագանու թեկնածուն իրավունք ունի՞ որպես դիտորդ գտնվել ընտրատեղամասում:
Պատասխան՝ ոչ:

12:20 10/07 ընտրատեղամասից ահազանգում են, որ մահացածների անունները առկա են ցուցակներում:

12:08 10/11 տեղամաս 40 դպրոց
Վստահված անձը ահազանգում է, խնդրում է խումբ ուղարկել: 4-րդ մեքենան ուղարկվել է:

12:05 Մոր անձնագրի ժամկետը երկարացնելու համար, դիմել են անձնագրային բաժին, սակայն անձնագիրը մինչ օրս չի վերադարձվել: Ի՞նչ անել:
Տրվել է խորհրդատվություն:

11:50 9/28 տեղամասում 2-րդ մեքենան արձանագրել է խախտում: Ընտրողը տեսել է, որ իր փոխարեն արդեն քվեարկել են, կազմվել է արձանագրություն:

11:45 Նոր-Նորքի 3/34, 106 դպրոց
Մեր ակտիվիստը իր քվեարկության ժամանակ պարզել է, որ ընտրատեղամասում քվեաթերթիկները ավարտվել են, բայց ծրարները դեռ ոչ:

11:43 51 դպրոց Քոչարի վրա
Ահազանգ է եղել, որ կանգնած են տղաներ, ոստիկանության աշխատակիցները մարդկանց ներս են տանում, գումարներ, նոր անձնագրեր տալիս:
Ն.Զարյանի վրա գումարներ են տալիս վստահված անձի կարգավիճակով: Մահացած անձինք կան ցուցակներում:
UPDATE: 3-րդ մեքենան 11:50 ուղարկվել է

11:40 4/59 Այգեձոր Արաբկիր տեղամաս
Հաշմանդամի հետ մեկ հոգի է եկել, մտել է խուց, ասել են բարեկամ է, օգնում է հաշմանդամին:
Տրվել է պատասխան:

11:40 Շենգավիթ 8/33
5-րդ մեքենան տեղեկացնում է, որ վստահված անձանց ցուցակների վրա կնիքներ չկան

11:40 93 դպրոց Դավիթաշեն, 5/17 տեղամաս մեքենա է ուղարկվել:
12-րդ մեքենան հայտնում է, որ ՀՀԿ-ից 3 հոգի վստահված անձ  է ներկա,  ՀՀկ-ի վստահված անձը խոչընդոտում է մեքենայի անձնակազմի աշխատանքներին:
Ուղարկվել է նաեւ 11 մեքենան:
UPDDATE: 12:07 Մեր անձնակազմի անդամներից մեկը ահազանգեց, որ քաշքշուկի արդյունքում մարմնական վնասվածք է ստացել: Դեպքի վայր մեկնեց լրացուցիչ իրավաբանների խումբ:
UPDATE: Մեր խումբը արձանագրել է, որ տեղամասում շրջում են անհայտ մարդիկ, որոնք փորձում են հսկել քվեարկության ընթացքը: Արագ արձագանքման խումբը մոտեցել է նրանց, պահանջել է փաստաթղթեր: Սկզբում ոչ մի փաստաթուղթ չեն ներկայացրել, հետո ոմն ներկայացել է որպես Լեւոն Բարսեղյան եւ ներկայացրել ՀՀԿ վստահված անձի փաստաթուղթ: Մինչ այդ փորձել է խլել ֆոտոխցիկը, ինչի արդյունքում մարմնական վնասվածք հասցրել մեր աշխատակազմի անդամներից մեկին: Կազմվել է արձանագրություն:

11:39 Հարց՝ Անձնագրի պատճենով կարո՞ղ է ընտրել: Ինչ անել, եթե կորել է անձնագիրը:
Պատասխան՝ Դիմել անձնագրային բաժին անձը հաստատող փաստաթուղթ ստանալու համար:

11:35 97 դպրոցից ահազանգ է ստացվել խախտումների, կուտակումների, կաշառքների վերաբերյալ: Ուղարկվել է մեքենա:

11:35 9/1 տեղամաս
2-րդ մեքենան տեղեկացնում է, որ ծեծի է ենթարկվել լրագրող Գոհար Վեզիրյանը:

11:25 9/04, 9/05 տեղամասեր ահազանգերով գնացել էր 4-րդ մեքենան, տեղեկացնում է, որ կան կուտակումներ, մեքենայի անձնակազմը դիմել է հանձնաժողովի նախագահին, վերջինս չի համաձայնվել որեւէ քայլ ձեռնարկել:

11:22 Հարց՝ Ընտրությունները ո՞ր ժամին են ավարտվում:
Տրվեց պատասխան:

11:13 110 դպրոցից ահազանգ, որ ընտրակաշառք են բաժանում: 
UPDATE: 6-րդ նեքենան 11:20 եղել է տեղում եւ տեղեկացնում է, որ ոչինչ չի նկատել: ԳԱԼԱ հեռուստատեսությունից նույնպես մարդիկ կան:

11:13 110 դպրոցում ընտրակաշառք է բաժանվում, 6-րդ մեքենան 11.20 տեղում պարզաբանում է:

11:10 5-րդ մեքենան տեղեկացնում է, որ 11/04 տեղամասում հարձակում է եղել հանձնաժողովի նախագահի վրա, նա հրաժարվում է բացատրություններ տալուց:
11/03 տեղամասում ցուցակների վրա կնիք չկա:

11:10 Իր կամքից անկախ քաղաքացուն ընդգրկել են Հանրապետական կուսակցության անդամների ցուցակում: Տրվեց խորհրդատվություն:

11:07 Հարց՝ զինծառայողը արձակուրդի մեջ է, ցանկանում է քվեարկել: Իրավունք ունի՞, թե՞ ոչ:
Պատասխան՝ ԸՕ համաձայն զինծառայողները ՏԻՄ ընտրություններին չեն մասնակցում:

11:05 9/04 եւ 9/05 ընտրատեղամասերում բաց քվեարկություն է: 4-րդ մեքենան ուղարկվել է:

10:56 114 դպրոց, 
2-րդ մեքենան տեղեկացնում է, որ վստահված անձը մոտենում է ընտրողներին եւ ուղղություններ տալիս: Այնտեղ է գտնվում նաեւ ԱԺ պատգամավոր Արմեն Մարտիրոսյանը եւ փորձում է կարգավորել:

10:50 Նար-Դոսի 38 9/1 ընտրատեղամաս
2-րդ մեքենան հայտնում է, որ կռիվ է եղել, ծեծել են 4-րդ իշխանություն, Հայք թերթերի լրագրողներին: Նրանք տեղափոխվել են հիվանդանոց: Ծեծողները եղել են ԱԺ պատգամավոր Լեւոն Սարգսյանը եւ նրա թիկնապահները:

10:40 Հարց՝ Անձի անունը բացակայում է ցուցակից:
Տրվել է խորհրդատվություն։

10:38  114 դպրոց, 10/20 ընտրատեղամաս
1-ին մեքենան տեղեկացնում է, որ Ժառանգություն կուսակցության պատգամավորը կարգավորում է ներսում իրավիճակը, որտեղ եղել են կուտակումներ, ինչ-որ մեկը առանց իրավասությունների մինչ այդ փորձել է ներսում կարգավորել իրավիճակը:

10:30 Շենգավիթ թիվ 74 դպրոց, 11/30 ընտրատեղամաս
Գումարներ են բաժանում:
10:35 UPDATE: Արագ արձագանքման մեքենան տեղեկացնում է, որ մարդկանց կուտակումներ կան:

10:30 Շենգավիթ 97 դպրոցում 11/31, 11/32 ընտրատեղամասերում մեքենաներով մեծ քանակությամբ մարդկանց են բերում, որոնք միաժամանակ մուտք են գործում ընտրատեղամաս: 6-րդ մեքենան գնացել է ու արձանագրել, որ երթուղային տաքսիներով մարդկանց են բերում:

10:30 Շենգավիթ 110 դպրոց; 11/27, 11/28 տեղամասերում մեքենաներով մարդկանց են բերում, մեծ քանակով մարդիկ միաժամանակ մուտք են գործում ընտրատեղամաս: Ուղարկվել է 6-րդ մեքենան:

10:30 5-րդ մեքենա
Շենգավիթ 74 դպրոց 11/30 ընտրատեղամաս
Զանգ՝ գումարներ են բաժանում, մեքենա է ուղարկվել:

10:30 2-րդ մեքենա, Չեխովի դպրոց 10/31 ընտրատեղամաս
Արագ արձագանքման մեքենան տեղեկացնում է, որ նորմալ իրավիճակ է, մեքենան գնացել էր

10.20 Տիգրամ Մեծի 27/2-րդ շենքում Հանրապետական կուսակցության շտաբ կա: Ընտրողների մեծ մասից անձնագրերը վերցվում են, հետո ընրողները գնում են քվեարկելու: ՈՒղարկվել է 1-ն մեքենան:

10:15 1/33 Նոր-Նորք
Լրագրողներին ներս չեն թողնում: Ուղարկվել է 8-8րդ մեքենան:

10.10 Նորագավիթ 12/10 6-րդ մեքենա
Խառը իրավիճակ, խցանումներ, կուտակումներ

9.45 12/13 Նորագավիթ
Մարդկանց մեքենաներով բերում էին քվեարկության: 6-րդ մեքենայի կողմից գրանցվել են բոլոր մեքենաների համարները:

9.45 6-րդ մեքենա, 11/32 Շենգավիթ համայնքի 97 դպրոց, 11/32 տեղամաս
Մեծահասակ ընտրողների կուտակումներ, որոնց բերում են մեքենաներով. Ուղարկվել է  մեքենա:
Ցուցակով մարդը ելումուտ էր անում, պարզաբանում են, որ կարգավորում են ընտրությունները:

9.29 7-րդ մեքենա, Նոր-Նորք
Հարց՝ Եթե կա տեսողության հետ խնդիր, եւ քաղաքացու փոխարեն քվեարկում է մեկ ուրիշը, պարտադի՞ր է կազմել արձանագրություն։
Պատասխան՝ ոչ։

9.25 182 դպրոց,
մեքենաներով ժողովրդին են բերում: Ողարկվել է մեքենա:
9.45 UPDATE: Մեքենան տեղում է, իրավիճակը  նորմալ:

9.23 6-րդ մեքենա, 97 դպրոց
Կուտակումներ են գոյացել։ Ոստիկանն է կարգավորում ընտրատեղամաս մուտք գործելը, ինչի իրավունքը նա չունի։

9.14 Հարց՝ Որ դատարան դիմել ցուցակում ընդգրկվելու համար։ Տրվել է խորհրդատվություն։

9.10 Վստահված անձը ցանկացել է իմանալ, թե ինչպես են բողոքի դիմում կազմում։ Տրվել է խորհրդատվություն։

9.10 Հարց՝ Քաղաքացին հաշվառված չէ։ Կարո՞ղ է ընտրել, թե՞ ոչ։ Տրվել է խորհրդատվություն։