Աջակցություն պրոբացիային ազգային ցանց

Հասարակական սեկտորի դերը պրոբացիայի կայացման գործում

19 հուլիսի, 2018թ., Երևան: Այսօր «Քաղաքացիական հասարակության ինստիտուտ» հասարակական կազմակերպությունը, իր գործընկերների՝ «Աստղացոլք»,  «Ընդդեմ իրավական կամայականության», «Ընտանիք և համայնք» ՀԿ-ների հետ համատեղ, 

կազմակերպեց քննարկում՝ «Հասարակական սեկտորի դերը պրոբացիայի կայացման գործում» խորագրով:

Քննարկմանը ելույթ ունեցավ նաև Պրոբացիայի Պետական Ծառայության պետ Արսեն Նավասարդյանը: Վերջինս խոսեց պրոբացիայի ինստիտուտի կայացման և առկա բացերի մասին, խրախուսեց պրոակտիվ համագործակցությունը։ Պարոն Նավասարդյանը հորդորեց քննարկումների արդյունքում ծագած մտքերն, առաջարկությունների փաթեթի տեսքով, ներկայացնել համապատասխան պետական մարմիններին։

Քննարկումներն ամփոփելով՝ «Քաղաքացիական հասարակության ինստիտուտ» ՀԿ-ի տնօրեն Արտակ Կիրակոսյանը խոսեց լուծումների մասին: Նա, մասնավորապես, ասեց. «Պրոբացիայի էֆեկտիվության տեսանկյունից առավել նպատակահարմար է համայնքահեն սոցիալական ծառայությունների ինտեգրումը, պրոբացիայի շահառուին մասնագիտական հանրօգուտ աշխատանք իրականցնելու հնարավորություն ընձեռելը, ինչպես նաև պրոբացիայի ծառայությանն անհրաժեշտ գործիքակազմով զինելը, մասնավորապես վաղաժամկետ ազատման գործընթացը հստակեցնելու նպատակով»։

«Քայլ դեպի արդար Հայաստան» ծրագիրը իրականացնում է «Քաղաքացիական հասարակության ինստիտուտ» հասարակական կազմակերպությունը` իր գործընկերներ «Աստղացոլք» ՀԿ-ի,  «Ընդդեմ իրավական կամայականության» ՀԿ-ի, «Ընտանիք և համայնք» ՀԿ-ի հետ համատեղ՝ «Իրավաբանների հայկական ասոցիացիա» հասարակական կազմակերպության ղեկավարությամբ իրականացվող կոնսորցիումի միջոցով  գործարկվող «Կառուցողական երկխոսության հանձնառություն» ծրագրով տրամադրված ենթադրամաշնորհների շրջանակներում:   

Ծրագրի բյուջեն կազմում է 25 միլիոն ՀՀ դրամ, որից 22,5 միլիոն դրամը տրամադրվել է «Կառուցողական երկխոսության հանձնառություն» ծրագրի կողմից:   Ծրագրի տևողությունն է` 2018թ. հունիսի 1-ից մինչև 2019թ. մայիսի 31-ը:

«Կառուցողական երկխոսության հանձնառություն» ծրագիրը ֆիանսավորվում է Եվրոպական միության կողմից:

Նույն օրը կայացավ նաև Աջակցություն Պրոբացիային Ազգային Ցանցի հիմնադիր ժողովը

Բեստ Վեստերն Կոնգրես հյուրանոցի Պիկասո սրահում կայացած Աջակցություն Պրոբացիային Ազգային Ցանցի hիմնադիր ժողովին մասնակցեցին ցանցի անդամներ` «Քաղաքացիական հասարակության ինստիտուտ»,  «Աստղացոլք»,  «Ընդդեմ իրավական կամայականության», «Ընտանիք և համայնք»  «Հայաստանի մանկական ասոցիացիա»,  «Սոցիալական արդարություն»,  «Փրոջեքթ Հարմոնի», «Երեխաների աջակցության կենտրոն» ՀԿ-ները:

Հիմնադիր ժողովն ընդունեց Ցանցի խորհրդանիշը, քննարկեց և ընդունեց Ցանցի կանոնադրությունը, ընտրեց Ցանցի համակարգող խորհուրդը:

Որոշվեց նաև «Քաղաքացիական հասարակության ինստիտուտ» ՀԿ-ին մեկ տարով վերապահել Ցանցի քարտուղարության գործառույթների իրականացումը, իսկ կազմակերպության տնօրեն Արտակ Կիրակոսյանին` համապատասխանաբար նշանակել կառավարման խորհդի նախագահ:

 Հաստատվեց նաև Էթիկայի հանձնաժողովի անդամների ընտրության կարգը:

Հիշեցնենք, որ Աջակցություն պրոբացիային ազգային ցանցին կարող են միանալ այն բոլոր ՔՀԿ-ները, որոնք շահագրգռված են պրոբացիայի ինստիտուտի զարգացմամբ: