Հունվարի 24-ին «Dundee Precious Metals Inc.»-ի առաջարկությամբ («DenoGold Mining Company»-ի 100% բաժնետոմսերի սեփականատեր ) Երևանում տեղի ունեցավ հանդիպում հասարակայնության ներկայացուցիչների հետ, ովքեր հանդես են գալիս Շահումյանի ոսկու բազմամետաղային հանքավայրի բաց եղանակով շահագործման նախագծի դեմ: Հանդիպմանը մասնակցեցին «Dundee Precious Metals Inc.»-ի գործադիր փոխնախագահ, գլխավոր գործադիր տնօրեն Ռիչարդ Հաուսը, առողջության, անվտանգության և շրջակա միջավայրի հարցերով տնօրեն Ռուբեն Միլսը, «Deno Gold Mining Company»-ի միջազգային կապերի և հասարակայնության հետ կապերի պատասխանատու Նորայր Աղայանը, «ԷկոԼուր» տեղեկատվական ՀԿ-ի նախագահ Ինգա Զարաֆյանը, Կապանի «Էկոլոգիական անվտանգության ապահովման և ժողովրդավարության զարգացման» ՀԿ-ի իրավախորհրդատու Արթուր Ղազարյանը: Ընկերությանը ներկայացվեցին Շահումյանի հանքավայրի բաց շահագործման հետևյալ հիմնկան խնդիրները' 

• ռիսկ կա, որ Կապանի տարածքի' մետաղներով և տոքսիկ տարրերով  աղտոտվածությունը բազմակի անգամ կավելանա, այն դեպքում, երբ քաղաքն արդեն գտնվում է էկոլոգիական աղետի շեմին 

•   լեռնահանքային արդյունաբերության ոլորտում կոռուպցիայի բարձր մակարդակը չի նպաստում էկոլոգիական ռիսկերի նվազեցմանը կամ ընդունված միջազգային փորձի ներդրմանը, կամ առողջությանը եւ շրջակա միջավայրին հասցված վնասի համար ընկերության պատասխանատվության բարձրացմանը 

•   ընկերության վարած քաղաքականության վերաբերյալ բնակչության կամ հասարակական կազմակերպությունների կարծիքին գործնականորեն ուշադրություն չի դարձվում: 

Իրենց հերթին ընկերության ներկայացուցիչները հայտնեցին, որ' 

•    իրենք Հայաստանում ուժեղացնում են կորպորատիվ մենեջմենթը 

•   մտադիր են հասարակայնության հետ երկխոսության բաց քաղաքականություն իրականացնել 

•    միջազգային ստանդարտներ են ներդնում պրակտիկայում անկախ նրանից, թե որ երկրում են աշխատում: 

Ընկերության ներկայացուցիչները նաև հավաստիացրին, որ  եթե ընկերությունը  հաստատի Շահումյանի հանքավայրը բաց եղանակով շահագործելու իր մտադրությունը, ապա այդ հարցը կդրվի հասարակական լայն քննարկման, և դրա հետ մեկտեղ կարևոր է ինչպես հասարակության կարծիքը, այնպես էլ պետական կառույցների: 

Հանդիպման ընթացքում «ԷկոԼուր»-ի և «Էկոլոգիական անվտանգության ապահովման և ժողովրդավարության զարգացման» ՀԿ-ի ներկայացուցիչները ևս մեկ անգամ ընդգծեցին, որ չեն փոխում իրենց դիրքորոշումը բաց շահագործման նախագծի նկատմամբ և կարծում են, որ բաց երկխոսության քաղաքականությունը պետք է իրականացվի կոնկրետ օրինակներով:

Ազբյուր' www.ecolur.org