Շիրակի մարզի թիվ 34/27 ընտրատեղամասում, որ տեղակայված է Ավտոկայան կոչվող թաղամասի Զատիկ մանկապարտեզում 10:30-ի դրությամբ ընտրողների թիվը գերազանցում էր հարյուրը: Առաջին խախտումը, որ արձանագրվեց «Քաղաքացիական հասարակության ինստիտուտի»դիտորդ Մարիաննա Էրոյանցի կողմից՝ ցուցանակի բացակայությունն էր:

Դիտորդը փորձեց ճշտել հանձնաժողովի նախագահ Անահիտ Գյոնջյանից ցուցանակի բացակայության պատճառը: Վերջինս պատասխանեց, որ մոռացել են և որ կաշխատեն ուղղել սխալը:

«Աղջիկ ջան, թող գնա էլի, կոպիտ սխալ չենքարել, կուղղենք էլի,–խորհուրդ տվեց հանձնաժողովի նախագահը՝ միաժամանակ հրահանգելով թղթի վրա ձեռագիր գրել ընտրատեղամասի համարը:

«Հետքն»արդեն տեղեկացել էր, որ թիվ 35/05 ընտրատեղամասում անձագրերի համար նախատեսված թանաքը «շուտ ցնդող» տեսակի է եղել, և հայտնաբերվելուց հետո այն փոխարինվել է նորմալ թանաքով: Պարզվեց՝ նույնխնդիրն առկա է եղել թիվ 34/27 ընտրատեղամասում:

Հանձնաժողովի նախագահ Անահիտ Գյոնջյանն ասաց, որ առավոտյան ժամը 8-ից մինչև 9:30 աշխատել են կարմիր գույնի թանաքով: Հետո նկատել են, որ թանաքը ցնդում է: Կազմել են արձանագրություն, տեղյակ են պահել ԿԸՀ-ին, ստացել են նոր թանաք կապույտ գույնի և ներկա պահին աշխատում են դրանով: Մինչև թանաքի յուրահատկությունները հայտանաբերելը կոնկրետ թիվ 34/27 ընտրատեղամսում 100 անձնագիր են կնքել:

Երանուհի Սողոյան

www.hetq.am

«Ընտրություններ 2012» իրավական նախաձեռնությունը մայիսի 6-ին համագործակցում է մի շարք լրատվամիջոցների հետ, այդ թվում ՝ «Հետք» օնլայնի։