Մարտի 14-ին կայացել է Վենետիկի հանձնաժողովի ներկայացուցչի հանդիպումը հայաստանյան քաղաքացիական հասարակական կազմակերպությունների հետ, որի առիթը ՀՀ ընտրական օրենսգրքի նախագիծն էր: Հանդիպմանը մասնակցել է նաև Քաղաքացիական հասարակության ինստիտուտի նախագահ Արտակ Կիրակոսյանը:

Նա նշել է, որ ԸՕ նախագծում չկա առկա երեք հիմնական խնդիրների լուծումը: Դրանք են՝ քվեարկության ամբողջ ընթացքի նկարահանում և առցանց հեռարձակում, քվեարկությանը մասնակցած անձանց ցուցակների հրապարակում և դիտորդների իրավունքների ընդլայնում: ՔՀԻ-ն նաև առաջարկել է էլեկտրոնային քվեարկության համակարգի ներդրում, սակայն ընդհանուր բազայով, այլ ոչ թե ըստ տեղամասերի, ինչպես նախատեսված է նախագծում:

«Այն եզրակացությունները, որոնք տրվում են ձեր կողմից, շատ կարևոր են Հայաստանի համար, շատ շնորհակալ ենք: Բայց այն ամենը, ինչ դուք ասում եք, իշխանությունների կողմից հրամցվում է այնպես, ինչպես իրենց ձեռնտու է: Ուստի կոչ եմ անում հնարավորինս թափանցիկ լինել և զգույշ ձևակերպումների մեջ, քանի որ ձեր ասածները պետք եղած դեպքում ներկայացվում են որպես վերջին ատյանի ճշմարտություն»,- իր ելույթում նշել է Արտակ Կիրակոսյանը:

Նշենք, որ Վենետիկի հանձնաժողովը ներկայացրել է իր նախնական գնահատականը ՀՀ ԸՕ նախագծի վերաբերյալ, իսկ վերջնական եզրակացությունը կտա Հայաստան կատարած այցից հետո: