ԱԺ նախագահ Արթուր Բաղդասարյանը հրավիրեց այդ պաշտոնում առաջին ասուլիսը, որտեղ
կարեւորեց խորհրդարանում քաղաքական առողջ մթնոլորտի ձեւավորումը, ինչպես նաեւ խորհրդարանի
գործունեության ակտիվացումը, թե՛ երկրի ներքին քաղաքական կյանքում եւ թե՛ նրա սահմաններից
դուրս։

Արթուր Բաղդասարյանի գործունեության կազմակերպչական մասն ուղղված է խորհրդարանի
աշխատանքն ավելի թափանցիկ դարձնելուն, իսկ պայմանները՝ եվրոպական չափանիշներին համապատասախանեցնելուն:
Չէ՞ որ ինքը հայտարարել է, որ եվրոպական գործիչ է:

Արթուր
Բաղդասարյանը պատասխանելով մեր հարցին, թե ինքն արդյո՞ք փոխել է իր կարծիքը «ԶԼ մասին»
օրենքի այժմ սեղանին դրված տարբերակի մասին, Բաղդասարյանը հայտարարեց. «Մեր պարտավորությունների
մեջ մտնում է նաեւ այս օրենքի ընդունումը. զանգվածային լրատվության մասին օրենք մեզ
պետք է, բայց այն կընդունվի հանձնաժողովում քննարկումներից հետո: Իսկ իմ կարծիքը ձեզ
հայտնի է»:

Հիշեցնենք, որ Արթուր Բաղդասարյանը, որպես «Օրինաց երկիր» խմբակցության նախագահ դեռ
նախորդ գումարման խարհրդարանում հայտարարել էր, որ դեմ է «ԶԼ մասին» օրինագծի այս տարբերակին:

Արթուր Բաղդասարյանը մտադրություն էր հայտնել հայ- թուրքական հանձնաժողով ստեղծելու
մասին. «Խորհրդարանական դիվանագիտությունը պետք է լինի ակտիվ։ Չեմ ասում՝ նետվենք
թուրքերի գիրկը, կամ ինտերակտիվ ու շատ ակտիվ հարաբերություններ ունենք: Երբ չկա ընդհանրապես
հարաբերություն, ի՞նչ խոսք կարող է լինել դիվանագիտական հարաբերությունների մասին.
ընդամենը շփումները պետք է ավելացնել»:

Հայտնի է, որ «Արդարություն» դաշինքը սեպտեմբերին խորհրդարանին ներկայացնելու է
մի շարք օրենդրական նախաձեռնություններ, մասնավորապես ավանդների հետ կապված։ ՕԵԿ խմբակցությունն
ինչպե՞ս է քվեարկելու այդ նախաձեռնությանը հարցին Արթուր Բաղդասարյանը պատասխանեց.
« ՕԵԿ-ն չի հրաժարվում ավանդների վերադարձի իր սկզբունքային մտադրությունից, մենք այդ
հարցը ներկայացրել ենք նաեւ մեր կոալիցիային։ Մենք խնդիրը համարում ենք կարեւոր եւ
ՕԵԿ-ն ոչ թե խոսքով այլ գործով հետեւողական է լինելու ավանդները վերադարձնելուն։ Պետք
է փնտրել եւ գտնել մեխանիզմներ»։

Մահապատժի վերացմանը Արթուր Բաղդասարյանը դեռ նախորդ գումարման ԱԺ- ում կողմ էր,
բայց բացառությամբ /հոկտեմբերի 27-ի ոճրագործների/: Այսօր նա հայտարարում է. «Մահապատիժը
պետք է վերացվի ոչ միայն նրա համար, որ մենք կատարենք պարտավորությունները, այլ ընդհանրապես
որեւէ մեկը չի կարող հիմնավորել՝ առանց ներման իրավունքի բանտարկությո՞ւնն է ավելի
ծանր պատիժ, թե մահապատիժը»։

Օրերս Արթուր Բաղդասարյանը հանդիպել էր Ռոյ Ռիվի եւ Նատալյա Վուտովայի հետ եւ խոսել
էին քրեական օրենսգրքի եւ զրպարտությունն ու հերյուրանքը ապաքրեականացնելու վերջիններիս
պահանջի մասին. «Ինձ համար անընդունելի է, որ պաշտոնական անձանց եւ հասարակ քաղաքացիների
համար զրպարտության դեպքում տարբեր պատիժներ են սահմանված: Ինչ վերաբերում է ընդհանրապես
զրպարտությունը ապաքրեականացնելուն, ապա մենք ուսումնասիրություններ ենք կատարել, եւ
պարզել, որ ընդամենը երեք երկրներում է, որ դա ապաքրեականացվել, սակայն այդտեղ էլ գործում
են բավականին խոշոր տուգանքներ»։

Ապա Արթուր Բաղդասարյանը լրագրողներին տեղեկացրեց, որ հարցը չի վերաբերում միայն
լրագրողներին. «Պատկերացրեք սպանության գործով մի վկա դատարանում գալիս ու զրպարտում
է ինչ- որ մեկին: Հասկանո՞ւմ եք, մարդու կյանքի հետ կարող ենք գործ ունենալ»: