Միջազգային դիտորդները 2012թ.
մայիսի 6–ի Ազգային ժողովի ընտրությունները բնութագրում են դրական, սակայն նաև արձանագրում
են՝ «քվեարկողների վրա գործադրած ճնշումները, բողոքների քննարկման անկատար գործընթացը
ստեղծել են անհավասար մրցակցային դաշտ»:

Միջազգային դիտորդները հայտնում
են, որ մինչև ընտրությունները ընկած հատվածում ընտրացուցակների հնարավոր չարաշահումն
ավելացրել է գործընթացի նկատմամբ թերահավատությունը: Նախընտրական շրջանում տեղի ունեցած
խախտումներից առանձնացրել են ևս երկու երևույթ՝ ընտրողներին 500 տրակտոր նվիրելը
և վարչական ռեսուրսների չարաշահումը:

«Դատարաններն աչք են թեքել խոշոր
նվիրատվություններից, անտեսվել են նաև այն գանգատները, որ որոշ կուսակցություններ օգտագործել
են դպրոցների ռեսուրսները քարոզչություն իրականացնելու համար»,- հայտնում է ԵԱՀԿ կարճաժամկետ
դիտորդական առաքելության հատուկ համակարգող, ԵԱՀԿ ԽՎ պատվիրակության ղեկավար Ֆրանսուա-Խաիեր
դե Դոննեան:

Դիտորդները չեն նշել անուններ,
բայց բոլորն էլ քաջ գիտեն, որ տրակտորներ բաժանել է «Բարգավաճ Հայաստան» կուսակցությունը,
իսկ վարչական ռեսուրսները չարաշահել է իշխող ու ընտրություններում հաղթած Հայաստանի
հանրապետական կուսակցությունը:

Ամեն դեպքում միջազգային
դիտորդները կարծում են, որ նմանատիպ խախտումներն ու ընտրությունների օրն
արձանագրած խախտումները զգալի կերպով չեն ազդել ընտրությունների արդյունքի վրա:
Նրանք պարզապես նշում են և պահանջում ուշադրություն դարձնել մի քանի
մտահոգությունների վրա, որոնք նկատել են այս ընթացքում:

«Որոշ քաղաքական կուսակցությունների
լայնածավալ միջամտությունների վերաբերյալ հաղորդումները լուրջ մտահոգությունների տեղիք
են տալիս»,- ասում է Եվրախորհրդի խորհրդարանական վեհաժողովի պատվիրակության ղեկավար՝
Վինթերբորնի Բարոնուհի Նիքոլսոնը:

Նա նաև հայտնում է, որ որոշ դեպքերում
խոչընդոտվել է ընտրողների տեղաշարժվելու իրավունքը, և խորհուրդ է տալիս իշխանություններին
խստիվ անդրադառնալ նաև այս հարցին, որ հաջորդ տարի կայանալիք նախագահական ընտրություններին
նման սխալներ չլինեն:

Միջազգային դիտորդները համոզված
են, որ միջազգային պարտավորությունները, որոնք Հայաստանը կամովին է ստանձնել, ոչ միշտ
են հարգվում: Նրանք դրական են գնահատում Ընտրական նոր  օրենսգիրքը, բայց համարում են, որ այն ամբողջությամբ
չի կիրառվել ընտրատեղամասերի կողմից, ուստի այս ոլորտում ՀՀ կառավարությունը ևս անելիքներ
ունի:

ԵԱՀԿ Ժողովրդավարական հաստատությունների
և մարդու իրավունքենրի գրասենյակի ընտրությունների դիտորդական առաքելության ղեկավար
Ռադմիլա Շեկերինսկան խոսեց կանանց ԱԺ-ում ներգրավված լինելու խնդրի մասին:

«Իհարկե գովելի է, որ այս տարի
ավելացել են քվոտաները կանանց համար, բայց քվոտան միայն գրանցման գործընթացին է վերաբերում,
որից հետո կանայք ինքաբացարկ են հայտարարում, ու իմաստը դրանից հետո կորում է»,- ասում
է Շեկերինսկան:

Անդրադառնալով այն հարցին, որ
ընտրատեղամասերում ընտրության օրը կնիքը ցնդում էր ու դրա պատճառով կասկածներ առաջացան,
որ մարդիկ կրկնակի են ընտրության մասնակցել՝ Ֆրանսուա-Խաիեր դե Դոննեան նշեց, որ մեղքը
ընտրատեղամասերի ղեկավարներին է պատկանում, ովքեր չեն ցնցել ներկանյութը օգտագործելուց
առաջ:

Դիտորդները միաբերան պնդեցին,
որ լրատվամիջոցներն այս տարի ապահովել են հավասար պայմաններ նախընտրական քարոզչության
համար: