Մենք` ներքոստորագրյալ կազմակերպությունների
ներկայացուցիչներս, անդրադառնալով Հայաստանում նախագահական ընտրությունների առաջին
փուլին եւ համոզված լինելով, որ այժմյան Հայաստանում հնարավոր է կազմակերպել եւ
անցկացնել ազատ, արդար եւ թափանցիկ ընտրություններ, արձանագրում ենք.

1. Պետական եւ իշխանության հսկողության տակ գտնվող
   ԶԼՄ-ները, մասնավորապես հեռուստակայանները, թեկնածուների համար հավասար պայմաններ
   չապահովեցին` միակողմանի քարոզչություն ծավալելով նախագահի թեկնածու՝ գործող
   նախագահի օգտին:
2. Իշխանությունները գործի դրեցին պետական վարչական
   ռեսուրսները` հօգուտ նախագահի թեկնածու` գործող նախագահի,  ճնշում գործադրելով
   հաստատությունների ղեկավարների եւ նրանց ենթակաների ու շահառունների վրա:
3. Ողջ նախընտրական փուլը ընթացավ ճնշումների,
   սպառնալիքների — բռնությունների գործադրմամբ:
4. Ընտրությունների օրը տեղական եւ միջազգային դիտորդների
   կողմից արձանագրվեցին բազմաթիվ օրինախախտումներ, ընտրակեղծիքներ, որոնք
   կատարվեցին կա'մ իշխանական զանազան օղակների անմիջական հանձնարարությամբ, կա'մ 
   թողտվությամբ:
5. Ընտրությունների ընթացքի ամփոփման փուլում ոչ թափանցիկ
   գործընթացը կասկածի տակ է դնում ընտրությունների վերջնական արդյունքները:
6. Փետրվարի 21-ից խաղաղ ցուցարարների ձերբակալումները եւ
   վարչական կալանքի ենթարկելը հակասում է  ՀՀ Սահմանադրությանը:
7. ԶԼՄ-ներով, առաջին հերթին հեռուստաալիքներով
   միակողմանի ներկայացվող տեղեկատվությունը, հնչող  հայատարարությունների սպառնալից
   ուղղվածությունը էլ ավելի են սրում վերը նշված հանգամանքների հետեւանքով ստեղծված
   լարված իրադրությունը: 

Ելնելով վերոհիշյալից.

1. Դիմում ենք ՀՀ իշխանություններին` պահանջելով ազատ
   արձակել վարչական կալանքի ենթարկված խաղաղ ցուցարարներին:
2. Դիմում ենք ՀՀ դատախազությանը` պահանջելով հնարավորինս
   արագ հետաքննել ընտրությունների ընթացքում տեղական եւ միջազգային դիտորդների
   կողմից արձանագրված եւ մամուլում հրապարակված փաստերը եւ նախնական արդյունքները
   հրապարակել մինչեւ երկրորդ փուլի քվեարկությունն սկսվելը: Դա կարող է կանխարգելել
   հետագա իրավախախտումները:
3. Դիմում ենք ՀՀ ոստիկանության ծառայությանը` պահանջելով
   մինչեւ ընտրությունների երկրորդ փուլը հանրությանը ներկայացնել ընտրությունների
   եւ ձայների հաշվման ընթացքում օրինախախտումների կանխարգելմանն ուղղված
   միջոցառումների ցանկը:
4. Դատապարտում ենք հանրությանը ահաբեկող
   հայտարարությունները, եւ
5. Կոչ ենք անում հանրությանը ակտիվորեն մասնակցել
   ընտրություններին, ինչը ընտրակեղծիքների կանխման գլխավոր երաշխիքներից մեկն է:
   

Հայաստանի Հելսինկյան Կոմիտե ՀԿ

Քաղաքացիական հասարակության զարգացման միություն ՀԿ

Խոսքի ազատության աջակցության հիմնադրամ

«Համագործակցություն հանուն ժողովրդավարության» միության
Հետաքննող լրագրողների ընկերակցության ՀԿ

Հելսինկյան քաղաքացիական ասամբլեայի Վանաձորի գրասենյակ

Կոչ ենք անում ՀԿ-ներին միանալ

Քաղաքացիական հասարակության զարգացման միություն

375033 Երեւան,

Փափազյան 15, բն.46

հեռ./ֆաքս 3741-223440

ձեռքի հեռ. 3749-403609

csdu@csdu.am

www.csdu.am