«ԳԱԼԱ» հեռուստաընկերությունն արդեն երկրորդ անգամ պատրաստվում է դիմել Մարդու իրավունքների եվրոպական դատարան, քանի որ Վճռաբեկ դատարանը մերժել է «ԳԱԼԱ» Հ/Ը  բողոքը՝ ուժի մեջ թողնելով ՀՀ վերաքննիչ դատարանի՝ Գյումրու հին հեռուստաաշտարակի վրայից հեռուստասարքավորումները ապամոնտաժելու մասին որոշումը:

Հեռուստաընկերության իրավաբան Կարեն Թումանյանը www.hra.am -ին հաղորդում է, որ դատարանի կողմից նշած հիմքերն ավելի շատ քաղաքական են, քան իրավական:

«Խնդիրը նրանում է, որ առաջին ատյանի դատարանը որոշում էր կայացրել, որ ուրիշի սեփականությունից օգտվելը հնարավոր է, բայց ոչ անվճար: Վերաքննիչ դատարանը նման լիազորություն չունենալով փոխել է այդ որոշումը' նշելով որ նման հնարավորությունն ընդհանրապես բացակայում է, իսկ Վճռաբեկ դատարանում դա հաստատվել է»,- ասում է Թումանյանը, ով արդեն սկսել է նախապատրաստել գործը Եվրոպական դատարանին ներկայացնելու համար:

«ԳԱԼԱ» հեռուստաընկերության տարածած հաղորդագրության մեջ նշվում է.

«4 տարի ձգձգվող դատական այս գործընթացը հանգուցալուծում է ստանում համապետական ընտրությունների նախաշեմին, և «ԳԱԼԱ» հեռուստաընկերությունը, ապամոնտաժելով իր հեռարձակող սարքավորումները, փաստացի կեթերազրկվի անորոշ ժամանակով»:

2008 թ.-ին քննված մեկ այլ՝ հարկային ստուգումներին եւ հեռուստաընկերությանը պարտադրված տուգանքին առնչվող գործով, «ԳԱԼԱ» հեռուստաընկերությունը դեռեւս 2009 թ. մարտի 13-ին հայց է ներկայացրել Մարդու իրավունքների եվրոպական դատարան:

Կարինե Իոնեսյան
Աղբյուրը' www.hra.am