Լեռնային Ղարաբաղի Պաշտպանության բանակի «Եղնիկներ» զորամասի ժամկետային զինծառայող Աղասի Աբրահամյանի մահվան գործով սեպտեմբերի  6-ին ձերբակալվել Է եւս երկու սպա. տեղեկացնում է ՀՀ ՊՆ քննչական ծառայությունը:

Սպաները ձերբակալվել են Քրեական օրենսգրքի 375 հոդվածով (իշխանությունը չարաշահելը, իշխանազանցությունը կամ իշխանության անգործությունը) նախատեսված հանցագործություն կատարելու կասկածանքով: 

Երեկ այս քրեական գործի շրջանակներում կալանավորվել էր մեկ ժամկետային զինծառայող, իսկ անցյալ շաբաթ' մեկ սպա:

11 օր առաջ բանակում դաժան ծեծի ենթարկված Աղասի Աբրահամյանի մահվան փաստով գործ է հարուցվել Քրեական օրենսգրքի 112-րդ հոդվածի 2-րդ մասի 14-րդ կետի հատկանիշներով (դիտավորությամբ առողջությանը ծանր վնասվածք հասցնելը, որն առաջացրել է մահ): Այս գործի շրջանակներում մեղադրանք է առաջադրվել 3 սպայի և մեկ զինծառայողի:

Սպաներին մեղադրանք է առաջադրվել Քր.օր. 375 հոդվածով (իշխանությունը չարաշահելը, իշխանազանցությունը կամ իշխանության անգործությունը), իսկ զինծառայողին՝  359 հոդվածի 1-ին մասով (զինծառայողների փոխհարաբերությունների կանոնագրքային կանոնները խախտելը նրանց միջեւ ստորադասության հարաբերությունների բացակայության դեպքում, որն արտահայտվել է անձի պատիվն ու արժանապատվությունը ստորացնելով, նրան ծաղրուծանակի ենթարկելով կամ հալածելով կամ զուգորդվել է բռնություն գործադրելով) նախատեսված հանցագործություն կատարելու համար:

Բժշկական փորձաքննության արդյունքները պետք է պատրաստ լինեն արդեն այսօր, որի արդյունքում ըստ զինդատախազության՝ հնարավոր է մեղադրանքները փոխվեն, եթե պարզվի, թե կոնկրետ որ հարվածն է մահացու եղել զինծառայող Աղասի Աբրահամյանի համար:

Աղբյուրը՝ www.hra.am