Արտակ Նազարյանի մահվան գործով հուլիսի 3-ի դատական նիստին պետք է ցուցմունք տար ամբաստանյալ Մխիթար Մխիթարյանը։ Նա  հրաժարվեց ցուցմունք տալ:

Տուժողի իրավահաջորդ Ծովինար Նազարյանը Մխիթարյանին հիշեցրեց, որ վերջինս վկաների հարցաքննության ժամանակ ռեպլիկներ էր հնչեցնում, մի շաբաթ առաջ էլ դատարանում հայտարարել է, որ  ցուցմունքներ կտա և կասի ճշմարտությունը, ինչո՞ւ հիմա ցուցմունք չի տալիս, մի շաբաթում ի՞նչ է փոխվել: Ամբաստանյալն ասաց, որ  ուղղակի միտքը փոխել է:

Դատավոր Սամվել Մարդանյանը հրապարակեց  Մխիթար Մխիթարյանի նախաքննական ցուցմունքները, զինվորների հետ նրա առերեսման արձանագրությունները: Ամբաստանյալը
նշեց, որ նախաքննության ընթացքում տված  իր ցուցմունքները ճիշտ են, իսկ առերեսման ժամանակ զինվորների՝ իր դեմ տված ցուցմունքները` սխալ: Այդ զինվորները ցուցմունք  էին տվել, որ Մ. Մխիթարյանը ծաղրալից տոնով է շփվել Արտակ Նազարյանի հետ:

Վկաների ցուցմունքներով` Մխիթարյանը մի անգամ հրաժարվել է  իրեն պատկանող բջջային հեռախոսի լիցքավորման մարտկոցը տալ Նազարյանին, այդ մերժումից հետո Նազարյանը ձեռքով թեթևակի հարվածել է Մխիթարյանի ուսին և ասել` լավ չես անում, Մխիթարյանն էլ  սեռական հայհոյանքներ տալով` հարվածել է Նազարյանին. ծեծկռտուք է սկսվել:  Դատարանում Մխիթարյանն ասաց, որ ինքը  բջջային հեռախոս և դրա լիքավորման մարտկոց չի ունեցել:

Նախաքննության ընթացքում Մխիթարյանը սկզբից ժխտել է, որ  կապիտան Հակոբ Մանուկյանի և լեյտենանտ Արտակ Նազարյանի միջև  ճաշարանում տեղի ունեցած վեճից և ծեծկռտուքից հետո ինքն է աղբյուրի մոտ լվացվելու ուղեկցել Արտակ Նազարյանին, ում քթից արյուն էր հոսում: Սակայն Հակոբ Մանուկյանի հետ առերեսման ժամանակ  Մխիթարյանը խոստովանել է, որ ինքն աղբյուրի մոտ է ուղեկցել Նազարյանին: Մխիթարյանը դատարանում հայտարարեց, որ կապիտան Մանուկյանն իրեն չի հրահանգելՆազարյանին աղբյուրի մոտ ուղեկցել: Պատասխանելով մեղադրող Հարություն Հարությունյանի  այն հարցին, թե իր դեմ ցուցմունք տված զինվորների հետ Մխիթարյանը  լավ հարաբերություններ է ունեցել, ինքն  ինչո՞ւ է  նրանց  ցուցմունքները կեղծ համարում, ամբաստանյալն ասաց, որ վկաները Ռազմական ոստիկանության նույն խցում են եղել, նրանց ցուցմունքները պայմանավորված են:

Մխիթար Մխիթարյանը դատարանում հայտարարեց, որ նախաքննության ընթացքում իրեն չեն
ծեծել, չեն ճնշել, սակայն 9 օր նա անօրինական կերպով գտնվել է  անազատության մեջ:  Տուժողի իրավահաջորդի ներկայացուցիչ, փաստաբան Մուշեղ Շուշանյանը դատարանի ուշադրությունը հրավիրեց այն հանգամանքի վրա, որ  Մխիթարյանը նույն ժամանակահատվածում  առերես հարցաքննվել է Հարութիկ Կիրակոսյանի և Արտակ Հովհաննիսյանի հետ:

Այնուհետև  դատարանում ցուցմունք տվեց քրեական գործով գլխավոր ամբաստանյալ, կապիտան Հակոբ Մանուկյանը: Գումարտակի հրամանատարի
նախկին տեղակալին հարցեր տալուց առաջ տուժողի իրավահաջորդի ներկայացուցիչ, իրավապաշտպան
Ռուբեն Մարտիրոսյանը նրան հորդորեց սուտ չխոսել: Իրավապաշտպանն  ասաց, որ ինքը նախկինում պաշտպանել է բանակում զինվորների
շահերն ընդդեմ սպաների, ոչ թե բոլոր սպաների, այլ 
ընդդեմ հանցագործ սպաների, զինվորական դատախազների,  դատավորների, քննիչների: Դատավոր Մարդանյանը
ձայնը բարձրացնելով, Մարտիրոսյանից պահանջեց 
իրեն կոռեկտ պահել, չափի մեջ լինել և կոնկրետ ասել, թե հանցագործ ո՞ր դատավորի,
դատախազի, քննիչի  մասին է խոսքը,  և  իրավապաշտպանին
կոչ արեց ամպագորգոռ, անպատասխանատու հայտարարություններ չանել:

Ռուբեն Մարտիրոսյանն ասաց, որ միջնորդում
է դատարանին  դիմել Պաշտպանության նախարարություն,
որտեղից  տեղեկանք կտրվի  վերոհիշյալի մասին: Ռ. Մարտիրոսյանը սկսեց թվարկել
օրինազանց դատախազների, քննիչների անունները, հավելելով, որ ինքը նիստը նախագահող Սամվել
Մարդանյանի դեմ  2002թ. «Իրավունք հետաքննություն»
թերթում հոդված է հրապարակել:

Իրավապաշտպանը հարցեր էր ուղղում ամբաստանյալ
 Հակոբ Մանուկյանին, երբ դատավոր Մարդանյանը
հայտարարեց, որ դահլիճից  խմիչքի վատ հոտ է
գալիս և  հարցրեց, թե ով է ոգելից խմիչք օգտագործել:
Ամբաստանյալ զինվորներից մեկի հայրը ոտքի կանգնեց, դատավորը նրան դահլիճից դուրս հրավիրեց:
Դրանից հետո դատավորն ասաց, որ խմիչքի հոտը Ռուբեն Մարտիրոսյանից է: Վերջինս հարցաքննվող Հակոբ
Մանուկյանի դեմ-դիմաց, դատավորին մոտ էր նստած: Ս. Մարդանյանն ասաց, որ Ռուբեն Մարտիրոսյանը
գինովցած է,«խմած» և ամպագորգոռ հայտարարություներ է անում: Իրավապաշտպանը ըստ էության
չժխտեց, որ ոգելից խմիչք է օգտագործել, հայտնեց, որ ինքը վատառողջ լինելու
պատճառով դեղ է օգտագործում, ասաց, որ «օգտագործած» բառը մի բան է նշանակում, «խմածը»՝
այլ: Դատավորը դատական սանկցիա կիրառելով՝ դուրս հրավիրեց Ռուբեն Մարտիրոսյանին:  Դատավորը նաև նախազգուշացրեց ներկաներին, որ
ոգելից խմիչք օգտագործած վիճակում չի կարելի նիստի ներկայանալ, այն անհարգալից
վերաբերմուքն է դատարանի հանդեպ: Տուժողի իրավահաջորդի ներկայացուցիչ, փաստաբան Մուշեղ
Շուշանյանը  դատարանում Ռուբեն Մարտիրոսյանի
վարքագիծը համարեց շատ պատշաճ, իրավիճակին համարժեք:

Պատասխանելով դատավարության մասնակիցների
հարցերին` կապիտան Մանուկյանն ասաց, որ նախաքննության ընթացքում փորձ է արվել  զինվոր Արման Մնացականյանի միջոցով իրեն
մեղադրանք վերագրել, թե իբր ինքն է սպանել Արտակ Նազարյանին, սակայն համոզվելով,
որ դեպքի պահին ինքը մարտական հենակետի ներքևի հատվածում է գտնվել՝ քննիչները
հրաժարվել են այդ մեղադրանքից:

Դատական հաջորդ նիստը կկայանա հուլիսի
10-ին, Հակոբ Մանուկյանի հարցաքննությունը կշարունակվի:

ՈսկանՍարգսյան

Իջևան