Հունիսի 2-9-ը Երևանում կանցկացվի սայլակից օգտվող հաշմանդամություն ունեցող անձանց միջազգային մարաթոն՝ «Համագործակցություն-2013» խորագրով։ Այն կազմակերպել են Հայաստանի երիտասարդական հիմնադրամը, Հայկական Կարմիր խաչի ընկերությունը, Ռուսաստանի երիտասարդ հաշմանդամների «Ապարրել» ասոցացիան։

Մարաթոնին մասնակցելու նպատակով Հայաստան են ժամանել 20-ից ավելի երիտասարդներ Ռուսաստանից և Ուկրաինայից։

Նախատեսված են մի շարք միջոցառումներ. մասնակիցները կայցելեն Հայոց ցեղասպանության զոհերի հուշահամալիր, Հայոց ցեղասպանության թանգարան-ինստիտուտ, Հաղթանակի զբոսայգի՝ Հայրենական մեծ պատերազմի զոհերի հուշարձանի մոտ։

Կկազմակերպվի կլոր սեղան–քննարկում ՀՀ աշխատանքի և սոցիալական հարցերի նախարարության ներկայացուցիչների մասնակցությամբ, ինչպես նաև՝ հանդիպումներ հաշմանդամություն ունեցող անձանց խնդիրներով զբաղվող երիտասարդական կազմակերպությունների հետ։ Հայաստանի, Ռուսաստանի և Ուկրաինայի երիտասարդները համատեղ կքննարկեն իրենց խնդիրները, կկիսվեն խնդիրների լուծման սեփական փորձով։

Միջացառումների շարքում նախատեսված է նաև հաշմանդամություն ունեցող և ոչ հաշմանդամ անձանց համատեղ երթ Երևանի փողոցներով, ֆլեշմոբ–ակցիա Հյուսիսային պողոտայում: