Րաֆֆի Հովհաննիսյանի «Ժառանգություն» կուսակցությունը մարտի 2-ին հրապարակել է եւ
կուսակցության համամասնական ցուցակը եւ տարածել մի հռչակագիր: Հռչակագրում ասվում
է.

«1991 թվականից ի վեր իր անկախությունը վերագտած Հայաստանը այսօր հայտնվել է
բախտորոշ նոր երկընտրանքի առջեւ` կամ դառնալ իր երկրի ազատ ու արժանապատիվ
քաղաքացու օրրանը, կամ շարունակելով վերջին տարիների ապօրինություններն ու
անարդյունավետ կառավարումը, վերածվել անհեռանկար տարածքի: Ընտրության իրավունքը
մերն է, եւ ճիշտ ընտրությունը բոլորիս կտանի դեպի հպարտ եւ բարեկեցիկ երկրի
որակապես նոր հանգրվան, որտեղ`

• Քաղաքացին պետության առաջնային արժեքն ու անկյունաքարն է:
• Պետականությունը քաղաքացիական ու ազգային հարատեւման երաշխիքն է, իսկ
  իշխանությունն իր տարանջատ ճյուղերով` ժողովրդի սահմանադրական հանձնակատարը:
• Խորհրդարանը քաղաքացիների քաղաքական հավաքականության հայելին է, որը ձեւավորվում
  է արդարորեն` ժողովրդի կամոք, գործում է հրապարակայնորեն ու հաշվետու, ուստիեւ
  բարձր վստահություն է վայելում:
• Զանգվածային տեղեկատվության միջոցները հանրային անկախ հսկիչ են, զերծ
  գրաքննությունից ու ցանկացած ճնշումներից:

Այդպիսի Հայաստանում պետությունը ներհյուսված է քաղաքացու մեջ, քաղաքացին`
պետության: Այդպիսի պետությունն ազատ ազգերի աշխարհում ճանաչվում է իբրեւ լիիրավ,
ինքնիշխան, հարգանքի արժանի ու պաշտպանված:

Մեր հավատո հանգանակն է`

• ազգի շահ,
• իրավունքի իշխանություն,

քաղաքացու պետություն»:

Դրված նպատակին հասնելու համար «Ժառանգությունը» մտադիր անել հետեւյալը:

• Մեր ուղերձը հասցնել ամենուր եւ բոլորին, զինվորագրել հիասթափվածներին ու
  չհիասթափվածներին, օտարվածներին ու չօտարվածներին, մեկուսացրածներին ու
  ինքնամեկուսացածներին` հանուրին:
• Արթնացնել հավատը սեփական ուժերի ու Հայաստանի ապագայի նկատմամբ:
• Համախմբված պայքարել վախի, անօրինականության եւ ամենաթողության, հիասթափության ու
  անտարբերության դեմ` հանուն արդար ընտրությունների:
• Ժողովրդավարական գործընթացների ծավալման եւ, հատկապես, մարդավայել
  ընտրությունների անցկացման համար ստեղծել առողջ, մասնակցային մթնոլորտ` ապահովելով
  ազատ ու արդար ընտրություն կատարելու նախադրյալներ, այլ ոչ թե պարտադրանքի ու
  սպառնալիքների իրադրություն:
• Եվ վերջապես` հարգել միմյանց, հավատալ մեր անհատական կամքին ու հավաքական
  հաղթանակին, տեր կանգնել իղձերի ու ազատության առհավատչյա մեԲր Հայրենիքին:

Մենք վճռակամ ենք հաղթելու խորհրդարանական ընտրություններում եւ հանրապետության այլ
ժողովրդավարական ուժերի հետ միասին ձեւավորելու իշխանության միակ աղբյուրի`
ժողովրդի վստահությունը վայելող ազգային կառավարություն` արդեն այս տարի հասնելով
երկրում համակարգային փոփոխությունների:Միասնական եւ ազատ երկրի արարումն ի կատար
ենք ածելու այսօրվանից եւ միասին: Հանուն Հավատի եւ Հայրենիքի»:

Կուսակցության համամասնական ցուցակի առաջին հորիզոնականում Րաֆֆի Հովհաննիսյանն է,
երկրորդում` ՀՀ մարդու իրավունքների առաջին պաշտպան Լարիսա Ալավերդյանը: Ցուցակում
են նաեւ Րաֆֆի Հովհաննիսյանի հիմնադրած ռազմավարական հետազոտությունների կենտրոնի
փորձագետ Ստեփան Սաֆարյանը, հոկտեմբերի 27-ին զոհված Յուրի Բախշյանի կինը` Անահիտ
Բախշյանը, «Հայ կամավորականների համախմբում» հասարակական նախաձեռնության անդամ
Սամվել Հարությունյանը: