Հունվարի 25-ին հայտարարությամբ է հանդես եկել Լեգիտիմ նախագահ 2008 շարժման նախաձեռնող խումբը: Հայտարարությունը վերաբերում է նախագահի ընտրության օրինականությունն ապահովելու մասին իշխանության խոսքերին:

«Նախընտրական քարոզչության օրերին Սերժ Սարգսյանը փորձում է համոզել ՀՀ քաղաքացիներին եւ միջազգային հանրությանը, որ նախագահական ընտրությունները անցնելու են առանց զանգվածային ընտրակեղծիքների և ապօրինի ճնշումների: Դժվար է հավատալ նրա հավաստիացումներին: Եթե իշխող վարչախումբը իսկապես ուզենար ազատ եւ արդար ընտրություններ կազմակերպել, ապա նախ եւ առաջ պետք է վերացներ քաղաքական ահաբեկումների մթնոլորտը, որը նրա կողմից ձեւավորվել է անցած խորհրդարանական ընտրություններից ամիսներ առաջ: Մասնավորապես, այն ժամանակ, ցուցադրական ձերբակալությունների եւ քաղաքական դատավարությունների արդյունքում, ազատազրկվեցին նախ ընդդիմադիր լրատվամիջոցներից մեկի ղեկավար Արման Բաբաջանյանը, իսկ հետո «Հայ Կամավորականների Համախմբման» ղեկավարներ Ժիրայր Սե‎ֆիլյանը եւ Վարդան Մալխասյանը, որոնք հայտարարել էին ընտրակեղծիքները կանխելու իրենց վճռականության մասին: Ընտրություններին նախորդած կանխարգելիչ քաղաքական հետապնդումները ընտրողներին հուսահատեցնելու եւ «մեր դեմ խաղ չկա» համոզմունքը տարածելու նպատակ էին հետապնդում։Այն, որ մինչեւ օրս քաղբանտարկյալները մնում են անազատության մեջ, վկայում է առաջիկա նախագահի ընտրությունն իրականում ահաբեկության եւ զանգվածային կեղծիքների մթնոլորտում անցկացնելու իշխանական մտադրության մասին: Լեգիտիմ նախագահ 2008 շարժման նախաձեռնող խումբը համարում է, որ միայն Ժիրայր Սեֆիլյանի, Վարդան Մալխասյանի եւ Արման Բաբաջանյանի ազատ արձակումը կարող է վկայել, որ անկեղծ է նախագահի ընտրությունն ազատ, արդար ու թափանցիկ անցկացնելու մասին իշխանության հավաստիացումըե: