Փողոցային առևտրով զբաղվողները այսօր իրենց բողոքի ձայն էին հայտնում Ռադիոտան առաջ, ուր տեղակայված է Հանրային հեռուստառադիոընկերության խորհուրդը:

Նրանք, ցուցապաստառները ձեռքներին, «ամոթ» էին վանկարկում:

Նրանց բողոքն ուղղված էր քաղաքական վերլուծաբան Գևորգ Ալթունյանի դեմ: Վերջինս իր «Տեսանկյուն» հաղորդաշարի ընթացում, ըստ ակցիայի մասնակիցների, վիրավորական խոսքերով է անդրադարձել իրենց:

«Նա մեզ անվանեց Գիքոր, իսկ այն կուսակցություններին, որոնք մեզ սատարում են, բազազներ: Այո այսօր մեր երկիրը բազազներից ու գիքորներից է կազմաված: Բայց բազազները հենց մեր իշխանության ներկայացուցիչներն են»,-ասաց ակցիայի մասնակիցներից մեկը:

Բողոքի իրենց խոսքը ակցիայի մասնակիցները գրավոր կերպով հանձնեցին Հանրային հեռուստառադիոընկերության խորհրդին: Սակայն նրանք հույս չունեն, որ իրենց քայլը որևէ արձագանք կստանա:

Փողոցային առևտրով զբաղվողները իրենց ակցիան կշարունակեն Երևան քաղաքի «Երևան Սիթի» սուպերմարկետներից մեկի առաջ:

Աղբյուր՝ http://www.a1plus.am