Սահմանամերձ գյուղերի բնակիչները սահմանապահ զինծառայողներ են. չնայած կրակոցների տակ հայտնվելու վտանգին, ապրում են հեռավոր գյուղերում ու չեն էլ պատրաստվում լքել իրենց հայրենի հողը: Նույնքան անվախ են նրանց երեխաները, ովքեր ամեն օր դպրոց ու մանկապարտեզ են հաճախում. նրանց համար արդեն սովորական են դարձել ադրբեջանական կողմից հնչող կրակոցները:

«Էս վերջին երկու տարին համարյա ամեն օր կրակոցներ կա սահմանի վրա...Շատ դաժան է առավոտը զարթնես, գնաս տեսնես կենդանի են թե չէ, սրտացավ ես դառնում...»,- ասում են Տավուշի մարզի Այգեպար գյուղի բնակիչները:

Բնակիչներն անհանգստացած են ամենավերջին դիվերսիայի պատճառով, երբ ՀՀ պաշտպանության նախարարության պաշտոնական կայքը հաղորդեց, որ ապրիլի 27-ի լուսաբացին երեք հայ զինծառայող է մահացել:

Նրանք գտնվել են մարդատար ավտոմեքենայի մեջ, երբ ՀՀ Տավուշի մարզի Մովսես-Այգեպար գյուղերի միջև ընկած ճանապարհահատվածում ադրբեջանցիների կողմից գնդակոծության է ենթարկվել նրանց մեքենան:

Զոհվել են պայմանագրային զինծառայողներ 27-ամյա Դավիթ Աբգարյանը, 25-ամյա Արամ Եսայանը և 21-ամյա Արշակ Ներսիսյանը: Պայմանագրային զինծառայող 27-ամյա Արկադի Եսայանին հաջողվել է փրկվել: Նա մինչև այսօր ոչ մի լրագրողի ոչ մի մեկնաբանություն չի տալիս:
Եվրոպայի անվտանգության և համագործակցության կազմակերպության (ԵԱՀԿ) ներկայացուցիչներն այս դեպքի առթիվ մշտադիտարկում են անցկացրել ու չեն արձանագրել ոչ մի խախտում: Իսկ Հայաստանում դեռ նախաքննություն է ընթանում:

«Շատերն ասում են, որ ընտրությունների պատճառով է եղել, վիճաբանություն է եղել տղաների միջև, որը սուտ է»,- կարծում են այգեպարցիները:

Ամենախոցելի դիրքերից է նաև Տավուշի մարզի Ներքին Կարմիրաղբյուր գյուղը. հայ–ադրբեջանական սահմանի 9 կմ-ն անցնում է հենց այս գյուղով՝ այն մշտապես պահելով հակառակորդի նշանառության տակ:
Այդ նշանառության անմիջական տուժողներից մեկն էլ Վոլոդյա Պետրոսյանն է. արձակված հերթական փամփուշտներից մեկը ջարդել է նրա ապակին, ծակել է պատից կախված կոստյումը ու անցք է բացել տարբեր փաստաթղթերի մեջ, այդ թվում նաև անձնագրում:

Մայիսի 9-ին ընդառաջ՝ կրակոցներն ավելի են ակտիվանում

Հաղթանակի օրը՝ մայիսի 9-ին, ադրբեջանցիները փորձել են նորից խախտել հրադադարի ռեժիմը՝ մի քանի ժամ շարունակ գնդակոծելով հայկական գյուղերը, բայց զոհեր չեն եղել:

Ինչպես հաղորդում է razm.info կայքն այս անգամ էլ, ինչպես միշտ, հակառակորդի նշանառության տակ են հայտնվել Տավուշի մարզի Ներքին Կարմիրաղբյուր, Այգեպար, Մովսես և Չինարի գյուղերը, որոնք հայ-ադրբեջանական սահմանից ուղիղ գծով շուրջ 300-500 մետր հեռավորության վրա են գտնվում:

Մովսես գյուղի համայնքապետ Լյուդվիգ Ապերյանը համոզված է, որ ինչպես նախորդ տարիներին, այս տարի էլ վերջին օրերի կրակոցները պայմանավորված են մայիսի 9-ի հետ, երբ Հայաստանում ու Արցախում տոնում են Շուշի քաղաքի ազատագրման, ԼՂՀ պաշտպանության բանակի կազմավորումը ու Երկրորդ աշխարհամարտում տարած հաղթանակը:

ՀՀ գլխավոր դատախազության տվյալներով՝ 2011թ արձանագրվել է զինվորական ծառայությունն անցնելու հետ կապված մահվան 36 դեպք, որից 30-ը հանցագործության հետևանքով, այդ թվում՝ 10-ը հակառակորդի կողմից կատարված: 

Լուսանկարները՝ Գոհար Աբրահամյանի